വാഷിംഗ്ടൺ: അമേരിക്കയും ഇറാനും തമ്മിലുള്ള വെടിനിർത്തൽ കരാർ നീട്ടുന്ന കാര്യത്തിൽ വാഷിംഗ്ടൺ ഇതുവരെ ഔദ്യോഗികമായി ധാരണയിലെത്തിയിട്ടില്ലെന്ന് മുതിർന്ന യുഎസ് ഉദ്യോഗസ്ഥൻ വ്യക്തമാക്കി. വെടിനിർത്തൽ കാലാവധി നീട്ടാൻ ഇരുരാജ്യങ്ങളും തത്വത്തിൽ അംഗീകാരം നൽകിയെന്ന വാർത്തകൾ പുറത്തുവരുന്നതിനിടെയാണ് സി.എൻ.എന്നിനോട് അമേരിക്കൻ പ്രതിനിധി ഈ കാര്യം വെളിപ്പെടുത്തിയത്. സമാധാന ഉടമ്പടിയിൽ എത്തുന്നതിനായി ഇറാനുമായി ചർച്ചകൾ സജീവമായി തുടരുകയാണെങ്കിലും, വെടിനിർത്തൽ നീട്ടുന്നത് സംബന്ധിച്ച് രേഖാമൂലമുള്ള കരാറിൽ ഇതുവരെ ഒപ്പിട്ടിട്ടില്ലെന്ന് അദ്ദേഹം പറഞ്ഞു.
സമാധാന ചർച്ചകൾക്കായി കൂടുതൽ സമയം അനുവദിക്കുന്നതിനായി വെടിനിർത്തൽ നീട്ടാനുള്ള സാധ്യത ഇപ്പോഴും നിലനിൽക്കുന്നുണ്ടെന്ന് വിഷയവുമായി അടുത്ത വൃത്തങ്ങൾ സൂചിപ്പിക്കുന്നു. എന്നാൽ ദീർഘകാല ചർച്ചകൾക്ക് പകരം എത്രയും വേഗത്തിൽ ഒരു സ്ഥിരമായ കരാറിലെത്താനാണ് ട്രംപ് ഭരണകൂടം താൽപ്പര്യപ്പെടുന്നത്. പാകിസ്താനിലോ ജനീവയിലോ വെച്ച് വരും ദിവസങ്ങളിൽ നടക്കാനിരിക്കുന്ന ചർച്ചകളിൽ ഇതിനെക്കുറിച്ച് കൂടുതൽ വ്യക്തത വരുമെന്നാണ് പ്രതീക്ഷിക്കുന്നത്. പശ്ചിമേഷ്യയിലെ സമാധാന ശ്രമങ്ങളെ സംബന്ധിച്ചിടത്തോളം ഈ ചർച്ചകൾ ഏറെ നിർണ്ണായകമാണ്.
