വാഷിംഗ്ടണ്: ലോകകപ്പ് ഫുട്ബോള് മത്സരത്തിനായുള്ള ടിക്കറ്റ് സംബന്ധിച്ച് പുതുതായി അവതരിപ്പിച്ച പ്രീമിയം പ്രൈസിംഗ് കാറ്റഗറികള്ക്കെതിരെ പ്രതിഷേധം ശക്തം. ഇതിനു പിന്നാലെ 2026 ലെ ഫിഫ ലോകകപ്പിനായി കൂടുതല് ടിക്കറ്റുകള് ഫിഫ വില്പ്പനയ്ക്കെത്തിച്ചു. ടിക്കറ്റ് വില സംബന്ധിച്ച് ആരാധകരുടെ ആശങ്കകളെ തുടര്ന്നാണ് ഈ നീക്കം.
ആകെയുള്ള 104 മത്സരങ്ങളിലേക്കും കൂടുതല് ടിക്കറ്റുകള് ലഭ്യമാക്കുമെന്ന് ഫിഫ അധികൃതര് അറിയിച്ചു. കാറ്റഗറിഒന്ന്, രണ്ട്, എന്നിവയ്ക്കൊപ്പം പുതുതായി ചേര്ത്ത ‘ഫ്രണ്ട് കാറ്റഗറി’ ടിക്കറ്റുകളും ഉള്പ്പെടുന്നു. മികച്ച സീറ്റുകള് നേരത്തെ തടഞ്ഞുവച്ചിരുന്നതായും പിന്നീട് ഗണ്യമായി ഉയര്ന്ന വിലയ്ക്ക് വീണ്ടും അവതരിപ്പിച്ചതായുമായുള്ള ആരാധകരുടെ വിമര്ശനത്തെ തുടര്ന്നാണ് തീരുമാനം.
സീറ്റ് വിഹിതത്തെ കുറിച്ചും വ്യാപക ആശങ്കകള് ഉയര്ന്നിട്ടുണ്ട്. മു്മ്പ് വാങ്ങിയ ടിക്കറ്റുകള് സൗകര്യം കുറഞ്ഞ സീറ്റുകളിലേക്ക് മാറ്റിയതായി ചിലര് പരാതിപ്പെടുന്നു. എന്നാല് ഈ പരാതികളെ കുറിച്ച് ഫിഫ ഇതുവരെ പരസ്യമായി പ്രതികരിച്ചിട്ടില്ല. ഇന്ഗിള്വുഡില് നടക്കുന്ന യുഎസ്-പരാഗ്വേ മത്സരം പോലുള്ള പ്രധാന മത്സരങ്ങള്ക്ക് പോലും ടിക്കറ്റ് വില്പന മന്ദഗതിയിലാണെന്ന് റിപ്പോര്ട്ടുകള് വരുന്നുണ്ട്.
അമേരിക്ക, കാനഡ, മെക്സിക്കോ എന്നിവിടങ്ങളില് ആതിഥേയത്വം വഹിക്കാന് പോകുന്ന ലോകകപ്പ്, ടൂര്ണമെന്റിന്റെ ഏറ്റവും വാണിജ്യപരമായി വിപുലമായ പതിപ്പായി ഇതിനകം തന്നെ കണക്കാക്കപ്പെടുന്നു. എന്നിരുന്നാലും, ഏറ്റവും പുതിയ സംഭവവികാസങ്ങള് ആരാധകര്ക്ക് ഇത് കൂടുതല് അപ്രാപ്യമാകുന്നുണ്ടോ എന്ന ആശങ്ക ഉയര്ത്തിയിട്ടുണ്ട്.
World Cup football: Protests against premium pricing category grow strong
