ന്യൂഡല്ഹി: കേരളത്തിന്റെ പുതിയ മുഖ്യമന്ത്രിയായി വി.ഡി സതീശന് എത്തുമോ എന്ന് ഇന്നറിയാം. ഇന്ന് രാവിലെ 11.30 ഓടെ കേരളത്തിലെ മുഖ്യമന്ത്രിയെ പ്രഖ്യാപിക്കുമെന്നാണ് സൂചന. നിലവില് ലഭിക്കുന്ന സൂചന പ്രകാരം വി. വി.ഡി സതീശന് മുഖ്യമന്ത്രി ആകുമെന്നാണ് വിവരം.മുഖ്യമന്ത്രിയെ തീരുമാനിക്കുന്നതില് അന്തിമ ചര്ച്ചകള് ഇന്ന് നടക്കും. കേരളത്തിലെ മുന് കെപിസിസി പ്രസിഡന്റുമാര് അടക്കമുള്ള നേതാക്കളെ കണ്ട രാഹുല്ഗാന്ധി, അവരുടെ അഭിപ്രായങ്ങള് തേടിയിരുന്നു. തുടര്ന്ന് പാര്ട്ടി പ്രസിഡന്റ് മല്ലികാര്ജുന് ഖാര്ഗെ, സോണിയാഗാന്ധി എന്നിവരുമായി ആശയവിനിമയം നടത്തിയശേഷമാകും അന്തിമ പ്രഖ്യാപനം ഉണ്ടാകുക.
മുഖ്യമന്ത്രിയെ തീരുമാനിക്കുന്നതില് എഐസിസി ജനറല് സെക്രട്ടറിയും വയനാട് എംപിയുമായ പ്രിയങ്ക ഗാന്ധിയുടെ നിലപാടും നിര്ണായകമായേക്കും. ഇന്നലെ രാത്രി വൈകിയാണ് കേരള നേതാക്കളുമായുള്ള ചര്ച്ച രാഹുല്ഗാന്ധി പൂര്ത്തിയാക്കിയത്. മുല്ലപ്പള്ളി രാമചന്ദ്രനുമായി ഫോണിലും രാഹുല് സംസാരിച്ചു. കെപിസിസി വര്ക്കിംഗ് പ്രസിഡന്റുമാരായ എപി അനില്കുമാര്, പിസി വിഷ്ണുനാഥ്, ഷാഫി പറമ്പില് എന്നിവരുടെ അഭിപ്രായവും തേടി.
ജനവികാരം പ്രതിപക്ഷനേതാവ് വി ഡിസതീശന് അനുകൂലമാണെന്ന് കെ മുരളീധരന് രാഹുലിനെ അറിയിച്ചെന്നാണ് സൂചന. പരസ്യമായി പറഞ്ഞില്ലെങ്കിലും വി എം സുധീരനും ഇതേ നിലപാട് അറിയിച്ചതായാണ് റിപ്പോര്ട്ട്. എന്നാല് രാഹുലിനോട് പറഞ്ഞത് വെളിപ്പെടുത്താന് താല്പ്പര്യപ്പെടുന്നില്ലെന്ന് എംഎം ഹസന് പറഞ്ഞു. കെ സുധാകരന് കൂടിക്കാഴ്ചയില് കെസിയെ പിന്തുണച്ചാണ് സംസാരിച്ചതെന്നാണ് സൂചന.
മുഖ്യമന്ത്രി സ്ഥാനത്തിനായി ചേരി തിരിഞ്ഞ് നടന്ന ശക്തിപ്രകടനങ്ങളെ കുറിച്ച് രാഹുല് നേതാക്കളോട് ചോദിച്ചു. ആരായിരുന്നു പ്രതിഷേധക്കാരുടെ പിന്നില്, നടപടികള് ആസൂത്രിതമായിരുന്നോ, ആര്ക്കൊക്കെ വേണ്ടിയാണ് മത്സരം നടന്നത് തുടങ്ങിയ കാര്യങ്ങള് രാഹുല് ചോദിച്ചതായാണ് സൂചന. എംഎല്എമാരെ സ്വാധീനിക്കാന് ശ്രമം നടന്നുവെന്ന ആക്ഷേപം ശരിയാണോയെന്നും രാഹുല് ചൊദിച്ചതായും പുറത്തുവരുന്ന റിപ്പോര്ട്ടുകള് വ്യക്തമാക്കുന്നു.
Chief Minister’s announcement today: Will Satheesan become the Chief Minister?
