ബെയ്റൂട്ട്: തങ്ങളുടെ രാജ്യത്തെ അമേരിക്കയുമായും ഇസ്രായേലുമായുള്ള യുദ്ധത്തിനുള്ള വെറും ഒരു ‘ബാർഗൈനിംഗ് ചിപ്പ്’ അഥവാ രാഷ്ട്രീയ പകിടയായി ഇറാൻ ഉപയോഗിക്കുകയാണെന്ന് ലെബനൻ പ്രസിഡന്റ് ജോസഫ് ഔൻ. ലെബനന്റെ ആഭ്യന്തര കാര്യങ്ങളിൽ ഇടപെടുന്നത് ഇറാൻ അടിയന്തിരമായി അവസാനിപ്പിക്കണമെന്നും അദ്ദേഹം ശക്തമായ ഭാഷയിൽ ആവശ്യപ്പെട്ടു.
ബെയ്റൂട്ടിലെ പ്രസിഡൻഷ്യൽ കൊട്ടാരത്തിൽ വെച്ച് പ്രമുഖ അന്താരാഷ്ട്ര മാധ്യമമായ സി.എൻ.എന്നിന് നൽകിയ പ്രത്യേക അഭിമുഖത്തിലാണ് ഇറാനെയും അവിടുത്തെ ഭരണകൂടത്തെയും രൂക്ഷമായി വിമർശിച്ചുകൊണ്ട് ലെബനൻ പ്രസിഡന്റ് രംഗത്തെത്തിയത്. ഇറാന്റെ പിന്തുണയോടെ രാജ്യത്ത് സമാന്തര ഭരണം നടത്തുന്ന ഹിസ്ബുള്ളയും ഇസ്രായേലും തമ്മിലുള്ള യുദ്ധം കണ്ട് ലെബനനിലെ ജനങ്ങൾ “പൂർണ്ണമായും മടുത്തിരിക്കുകയാണെന്ന്” അദ്ദേഹം തുറന്നടിച്ചു.
നേരിട്ട് ഇറാനെ അഭിസംബോധന ചെയ്തുകൊണ്ട് പ്രസിഡന്റ് ജോസഫ് ഔൻ പറഞ്ഞത് ഇങ്ങനെയാണ്: “നിങ്ങൾ ഞങ്ങളെ സഹായിക്കാൻ ശ്രമിക്കുകയല്ല ചെയ്യുന്നത്. നിങ്ങളുടെ സ്വന്തം സ്വാർത്ഥ താല്പര്യങ്ങൾക്ക് വേണ്ടി ലെബനനിലെ സാധാരണക്കാരായ ജനങ്ങളാണ് ഇവിടെ വലിയ വില നൽകേണ്ടി വരുന്നത്. ഞങ്ങളുടെ രാജ്യത്തിന്റെ താല്പര്യങ്ങളും നിങ്ങളുടെ താല്പര്യങ്ങളും തമ്മിൽ യാതൊരു ബന്ധവുമില്ല.” ഇറാന്റെ ഉന്നത സൈനിക വിഭാഗമായ ഇസ്ലാമിക് റവല്യൂഷണറി ഗാർഡ് കോർപ്സിനെതിരെയും (IRGC) അദ്ദേഹം ആഞ്ഞടിച്ചു. “ഇത് നിങ്ങളുടെ രാജ്യമല്ല, ഇത് ഞങ്ങളുടെ രാജ്യമാണ്,” അദ്ദേഹം ഓർമ്മിപ്പിച്ചു.
യു.എസ്-ഇറാൻ വെടിനിർത്തൽ കരാറിന്റെ ഭാഗമായി ഇസ്രായേൽ സൈന്യം ലെബനനിൽ നിന്ന് പിന്മാറണമെന്ന് കഴിഞ്ഞ ബുധനാഴ്ച റെവല്യൂഷണറി ഗാർഡ് പ്രസ്താവനയിലൂടെ ആവശ്യപ്പെട്ടിരുന്നു. ഇതിനെ പൂർണ്ണമായി തള്ളിക്കളഞ്ഞ പ്രസിഡന്റ്, അമേരിക്കയുമായുള്ള തങ്ങളുടെ നയതന്ത്ര ചർച്ചകളിൽ മേൽക്കൈ നേടാൻ ഇറാൻ ലെബനനെ ഒരു ആയുധമാക്കുകയാണെന്നും ഇത് ഒരു തരത്തിലും അംഗീകരിക്കാൻ കഴിയില്ലെന്നും വ്യക്തമാക്കി.
കഴിഞ്ഞ ബുധനാഴ്ച ഇസ്രായേലും ലെബനനും തമ്മിൽ ഒരു താൽക്കാലിക വെടിനിർത്തൽ കരാറിൽ എത്തിയിരുന്നുവെങ്കിലും അതിന്റെ ഭാവി ഇപ്പോഴും അനിശ്ചിതത്വത്തിലാണ്. തെക്കൻ ലെബനനിൽ നിന്നുള്ള ഹിസ്ബുള്ള സായുധരുടെ പൂർണ്ണമായ പിന്മാറ്റവും ആക്രമണങ്ങൾ പൂർണ്ണമായി നിർത്തലാക്കലും മാത്രമാണ് ഈ കരാറിന്റെ പ്രധാന നിബന്ധന.
വളരെ കഠിനമായ ചർച്ചകൾക്കൊടുവിലാണ് ഇത്തരമൊരു സുപ്രധാന തീരുമാനത്തിൽ എത്തിയതെന്നും ഈ കരാർ മേഖലയിൽ നീതിപൂർവ്വവും ശാശ്വതവുമായ സമാധാനത്തിലേക്കുള്ള ശരിയായ പാതയാണെന്നും പ്രസിഡന്റ് ജോസഫ് ഔൻ പ്രത്യാശ പ്രകടിപ്പിച്ചു. എന്നാൽ ഈ നയതന്ത്ര ചർച്ചകളിൽ ഒരിടത്തും പങ്കാളിയാകാതിരുന്ന ഹിസ്ബുള്ള, ഈ കരാറിനെ പൂർണ്ണമായി തള്ളിക്കളയുകയാണ് ചെയ്തത്. തെക്കൻ ലെബനനിൽ നിന്നുള്ള ഇസ്രായേൽ സൈന്യത്തിന്റെ പൂർണ്ണമായ പിന്മാറ്റം ഉറപ്പുനൽകാത്ത ഒരു കരാറും അംഗീകരിക്കില്ലെന്നാണ് ഹിസ്ബുള്ളയുടെ നിലപാട്. ഇതോടെ മേഖലയിലെ സമാധാന ശ്രമങ്ങൾ വീണ്ടും പ്രതിസന്ധിയിലായിരിക്കുകയാണ്.
