കൊച്ചി: രാഷ്ട്രീയ വൃത്തങ്ങളിൽ വലിയ കൊടുങ്കാറ്റുയർത്തിയ മാസപ്പടി കേസിൽ സിഎംആർഎൽ (CMRL) ജോയിന്റ് മാനേജിങ് ഡയറക്ടർ ശരൺ എസ്. കർത്ത, ഡയറക്ടറും എംപവർ ഇന്ത്യ ഡയറക്ടറുമായ ജയ കർത്ത എന്നിവരെ എൻഫോഴ്സ്മെന്റ് ഡയറക്ടറേറ്റ് (ED) ഇന്ന് വിശദമായി ചോദ്യം ചെയ്തു. രാവിലെ 10.15 ഓടെ കൊച്ചിയിലെ ഇഡി ഓഫീസിൽ ഹാജരായ ഇരുവർക്കുമൊപ്പം കമ്പനിയുടെ ചീഫ് ഫിനാൻഷ്യൽ ഓഫീസറും എത്തിയിരുന്നു. മുഖ്യമന്ത്രി പിണറായി വിജയന്റെ മകൾ വീണ വിജയന്റെ ഉടമസ്ഥതയിലുള്ള ‘എക്സാലോജിക് സൊല്യൂഷൻസ്’ എന്ന സ്ഥാപനവുമായി നടത്തിയ കോടിക്കണക്കിന് രൂപയുടെ സാമ്പത്തിക ഇടപാടുകളുടെ നിജസ്ഥിതി പുറത്തുകൊണ്ടുവരാനാണ് ഇഡിയുടെ നീക്കം.
വീണ വിജയന്റെ സ്ഥാപനത്തിന് എന്ത് സേവനത്തിന്റെ അടിസ്ഥാനത്തിലാണ് പണം നൽകിയതെന്നും, ഈ സാമ്പത്തിക ഇടപാടുകളുടെ സ്രോതസ്സ് എന്താണെന്നുമാണ് ശരൺ കർത്തയിൽ നിന്ന് ഇഡി പ്രധാനമായും ചോദിച്ചറിഞ്ഞത്. കൂടാതെ, സിഎംആർഎല്ലിന്റെ സഹോദര സ്ഥാപനമായ ‘എംപവർ ഇന്ത്യ’യിൽ നിന്നും വീണയ്ക്ക് 50 ലക്ഷം രൂപ വായ്പയായി നൽകിയിരുന്നു. ഈ വായ്പ അനുവദിച്ചതിന്റെ പശ്ചാത്തലം, വായ്പ നൽകാൻ പുലർത്തിയ മാനദണ്ഡങ്ങൾ, നിലവിലെ തിരിച്ചടവ് വിവരങ്ങൾ എന്നിവയെക്കുറിച്ചാണ് എംപവർ ഇന്ത്യ ഡയറക്ടറായ ജയ കർത്തയോട് അന്വേഷണ സംഘം ആരാഞ്ഞത്.
അതേസമയം, കേസിൽ അതീവ നിർണ്ണായകമായ ചോദ്യം ചെയ്യലിനായി മുഖ്യമന്ത്രിയുടെ മകൾ വീണ വിജയൻ നാളെ (ജൂൺ 17) ഇഡിക്ക് മുന്നിൽ ഹാജരായേക്കുമെന്നാണ് വിവരം. ചോദ്യം ചെയ്യലിന് നേരിട്ട് ഹാജരാകാൻ ആവശ്യപ്പെട്ട് ഇഡി നേരത്തെ വീണയ്ക്ക് സമൻസ് അയച്ചിരുന്നു. നാളത്തെ തീയതിയിൽ ഹാജരാകുന്നതിന് വീണ വിജയൻ ഇതുവരെ കൂടുതൽ സമയം ചോദിക്കുകയോ സാവകാശത്തിനായി അപേക്ഷിക്കുകയോ ചെയ്തിട്ടില്ലാത്തതിനാൽ, അവർ നാളെ ചോദ്യം ചെയ്യലിന് എത്തുമെന്നാണ് ഇഡി വൃത്തങ്ങൾ നൽകുന്ന സൂചന.
