ന്യൂഡൽഹി: രാജ്യത്തെ മെഡിക്കൽ പ്രവേശനത്തിനായുള്ള നീറ്റ് പുനഃപരീക്ഷ കനത്ത സുരക്ഷാ ക്രമീകരണങ്ങളോടെ ഇന്ന് നടക്കുന്നു. കഴിഞ്ഞ മെയ് മാസത്തിൽ നടന്ന ആദ്യ പരീക്ഷ ചോദ്യപേപ്പർ ചോർച്ചയെയും ക്രമക്കേടുകളെയും തുടർന്ന് റദ്ദാക്കിയ സാഹചര്യത്തിലാണ് ദേശീയ പരീക്ഷാ ഏജൻസി വീണ്ടും പരീക്ഷ നടത്തുന്നത്. രാജ്യത്തുടനീളമുള്ള 23 ലക്ഷത്തോളം വിദ്യാർത്ഥികളാണ് ഇന്ന് പുനഃപരീക്ഷയ്ക്കായി ഹാജരാകുന്നത്. ഉച്ചയ്ക്ക് 2:00 മണി മുതൽ വൈകിട്ട് 5:15 വരെയാണ് പരീക്ഷാ സമയം ക്രമീകരിച്ചിരിക്കുന്നത്. സുഗമമായ പരീക്ഷാ നടത്തിപ്പിനായി എല്ലാവിധ ഒരുക്കങ്ങളും പൂർത്തിയായതായി അധികൃതർ വ്യക്തമാക്കിയിട്ടുണ്ട്.
സുരക്ഷാ വീഴ്ചകൾ പൂർണ്ണമായും ഒഴിവാക്കാൻ വിപുലമായ സാങ്കേതിക-സുരക്ഷാ സംവിധാനങ്ങളാണ് ഇത്തവണ ഏർപ്പെടുത്തിയിരിക്കുന്നത്. രാജ്യത്തെ 551 നഗരങ്ങളിലും വിദേശത്തെ 14 നഗരങ്ങളിലുമായി ആകെ 5,440 പരീക്ഷാ കേന്ദ്രങ്ങളാണ് ഇതിനായി സജ്ജമാക്കിയിട്ടുള്ളത്. പരീക്ഷാ കേന്ദ്രങ്ങളിലും പരിസരങ്ങളിലും നിരീക്ഷണം ശക്തമാക്കാൻ ഒന്നര ലക്ഷത്തോളം സിസിടിവി ക്യാമറകളും 51,000 സിഗ്നൽ ജാമറുകളും സ്ഥാപിച്ചിട്ടുണ്ട്. കൂടാതെ ആൾമാറാട്ടവും മറ്റ് ക്രമക്കേടുകളും തടയുന്നതിനായി ആധാർ അധിഷ്ഠിത ബയോമെട്രിക് വെരിഫിക്കേഷനും കർശനമായ സുരക്ഷാ പരിശോധനയും വിദ്യാർത്ഥികൾക്കായി നിർബന്ധമാക്കിയിട്ടുണ്ട്.
ചോദ്യപേപ്പറുകളുടെ സുരക്ഷിതമായ കൈമാറ്റത്തിനായി ജിപിഎസ് അധിഷ്ഠിത ട്രാക്കിങ് സംവിധാനവും ഏർപ്പെടുത്തിയിട്ടുണ്ട്. ക്രമസമാധാന പരിപാലനത്തിനായി കേന്ദ്ര സേനയുടെയും സംസ്ഥാന പോലീസിന്റെയും കനത്ത കാവലാണ് പരീക്ഷാ കേന്ദ്രങ്ങൾക്ക് ചുറ്റും ഏർപ്പെടുത്തിയിരിക്കുന്നത്. ചോദ്യപേപ്പറിന്റെയും ഉത്തരക്കടലാസുകളുടെയും സുരക്ഷയ്ക്കായി രണ്ടര ലക്ഷം പോലീസ് ഉദ്യോഗസ്ഥരെയും 15,000 അർദ്ധസൈനികരെയുമാണ് വിവിധയിടങ്ങളിലായി വിന്യസിച്ചിട്ടുള്ളത്. മുൻകാലങ്ങളിലെ വിവാദങ്ങൾക്ക് ശേഷം പരീക്ഷയുടെ വിശ്വാസ്യത തിരിച്ചുപിടിക്കാനുള്ള കനത്ത ജാഗ്രതയിലാണ് എൻടിഎയും കേന്ദ്ര സർക്കാരും.
