ന്യൂഡൽഹി: വിവാദങ്ങൾക്കും ആശങ്കകൾക്കും ഒടുവിൽ നടക്കുന്ന നീറ്റ് യുജി പുനഃപരീക്ഷയ്ക്കുള്ള ഒരുക്കങ്ങൾ അന്തിമഘട്ടത്തിൽ. പരീക്ഷാ സജ്ജീകരണങ്ങളും സുരക്ഷാ ക്രമീകരണങ്ങളും വിലയിരുത്തുന്നതിനായി നാഷണൽ ടെസ്റ്റിംഗ് ഏജൻസി രാജ്യവ്യാപകമായി മോക് ഡ്രിൽ നടത്തി. പരീക്ഷാ കേന്ദ്രങ്ങളിലെ സിസിടിവി സംവിധാനങ്ങൾ, ബയോമെട്രിക് പരിശോധനകൾ, ചോദ്യപേപ്പർ വിതരണത്തിനുള്ള സുരക്ഷാ പാതകൾ എന്നിവയുടെ കാര്യക്ഷമത ഉറപ്പാക്കാനാണ് മോക് ഡ്രിൽ സംഘടിപ്പിച്ചത്.
പരീക്ഷയ്ക്ക് മുന്നോടിയായി വിപുലമായ സുരക്ഷാ-മാർഗനിർദ്ദേശങ്ങളാണ് എൻടിഎ വിദ്യാർത്ഥികൾക്കായി പുറത്തിറക്കിയിട്ടുള്ളത്. കൃത്യമായ സമയക്രമം പാലിക്കുക, കടുത്ത സുരക്ഷാ പരിശോധനകളോട് സഹകരിക്കുക, സമൂഹമാധ്യമങ്ങളിലൂടെയുള്ള വ്യാജവാർത്തകളിൽ വഞ്ചിതരാകാതിരിക്കുക തുടങ്ങിയ നിർദ്ദേശങ്ങൾ ഇതിൽ ഉൾപ്പെടുന്നു. പരീക്ഷാർത്ഥികളുടെ മാനസിക സമ്മർദ്ദം കുറയ്ക്കുന്നതിനായി ‘മാനസ്’ എന്ന പ്രത്യേക ഹെൽപ്പ് ലൈൻ നമ്പറും (14416) എൻടിഎ സജ്ജമാക്കിയിട്ടുണ്ട്.
ആൾമാറാട്ടം തടയാൻ കർശന നിയന്ത്രണം; മെഡിക്കൽ കോളേജുകൾക്ക് അവധിയില്ല
പരീക്ഷയിൽ വലിയ രീതിയിലുള്ള ക്രമക്കേടുകളും ആൾമാറാട്ടവും ഒഴിവാക്കാൻ ദേശീയ മെഡിക്കൽ കമ്മീഷൻ കടുത്ത നടപടികളിലേക്ക് കടന്നു. ഇതിന്റെ ഭാഗമായി രാജ്യത്തെ മെഡിക്കൽ കോളേജുകളിൽ പഠിക്കുന്ന വിദ്യാർത്ഥികൾക്ക് ഇന്നും നാളെയും അവധി നൽകരുതെന്ന് എൻഎംസി കർശന നിർദ്ദേശം നൽകി. മുൻവർഷങ്ങളിൽ മെഡിക്കൽ വിദ്യാർത്ഥികൾ പണം വാങ്ങി മറ്റ് ഉദ്യോഗാർത്ഥികൾക്കായി ആൾമാറാട്ടം നടത്തി പരീക്ഷ എഴുതിയ പശ്ചാത്തലത്തിലാണ് ഈ നടപടി. മെഡിക്കൽ കോളേജുകളിലെ വിദ്യാർത്ഥികളുടെ ഹാജർ നില കൃത്യമായി നിരീക്ഷിക്കാനും എൻഎംസി അധികൃതർക്ക് നിർദ്ദേശം നൽകിയിട്ടുണ്ട്.
