വാഷിംഗ്ടൺ: ഇറാന്റെ ആണവ പദ്ധതിയെക്കുറിച്ചുള്ള ചർച്ചകൾ അങ്ങേയറ്റം സാങ്കേതികത്വം നിറഞ്ഞതാണെന്നും ഇവ പൂർത്തിയാകാൻ മാസങ്ങൾ എടുത്തേക്കാമെന്നും യുഎസ് വിദേശകാര്യ സെക്രട്ടറി മാർക്കോ റൂബിയോ വ്യക്തമാക്കി. ചൊവ്വാഴ്ച സെനറ്റ് ഫോറിൻ റിലേഷൻസ് കമ്മിറ്റിക്ക് മുന്നിലാണ് അദ്ദേഹം അമേരിക്കയുടെ നിലപാട് അറിയിച്ചത്. എന്നാൽ ഇത്തരം ചർച്ചകളിലേക്ക് കടക്കുന്നതിന് മുൻപ് ഹോർമുസ് കടലിടുക്ക് വീണ്ടും തുറക്കാൻ ഇറാൻ തയ്യാറാകണമെന്നതാണ് യുഎസിന്റെ പ്രധാന നിബന്ധനയെന്നും അദ്ദേഹം കൂട്ടിച്ചേർത്തു.
മലനിരകൾക്കിടയിൽ ഒളിപ്പിച്ചിരിക്കുന്ന ഉയർന്ന തോതിൽ സമ്പുഷ്ടീകരിച്ച യുറേനിയത്തിന്റെ നിക്ഷേപം കൈകാര്യം ചെയ്യുന്നതുമായി ബന്ധപ്പെട്ട് കൃത്യമായ ചർച്ചകൾക്ക് ഇറാൻ തയ്യാറാകേണ്ടതുണ്ടെന്ന് മാർക്കോ റൂബിയോ ചൂണ്ടിക്കാട്ടി. രാജ്യത്തെ യുറേനിയം സമ്പുഷ്ടീകരണ പ്രവർത്തനങ്ങൾക്ക് കർശനവും ദീർഘകാലത്തേതുമായ നിയന്ത്രണങ്ങൾ ഏർപ്പെടുത്താനോ അല്ലെങ്കിൽ അത് പൂർണ്ണമായി റദ്ദാക്കാനോ ഇറാൻ സമ്മതിക്കണം. അങ്ങേയറ്റം സങ്കീർണ്ണമായ സാങ്കേതിക വശങ്ങളുള്ള വിഷയമാണിതെന്നതിനാൽ വെറും അഞ്ച് ദിവസങ്ങൾക്കുള്ളിൽ ഇതിൽ പരിഹാരം കാണാനാകില്ലെന്നും വിദഗ്ദ്ധ സംഘത്തിന്റെ നേതൃത്വത്തിൽ മുപ്പതോ അറുപതോ തൊണ്ണൂറോ ദിവസങ്ങൾ നീളുന്ന വിശദമായ ചർച്ചകൾ ഇതിന് ആവശ്യമായി വരുമെന്നും അതിന് ഇറാൻ സന്നദ്ധത പ്രകടിപ്പിക്കണമെന്നും അദ്ദേഹം ആവശ്യപ്പെട്ടു.
കടലിടുക്ക് വഴിയുള്ള ഗതാഗതം പൂർണ്ണമായും സൗജന്യമായിരിക്കുമെന്നും അവിടെ സ്ഥാപിച്ച മൈനുകൾ നീക്കം ചെയ്യുമെന്നും കപ്പലുകൾക്ക് നേരെ ആക്രമണം ഉണ്ടാകില്ലെന്നും ഇറാൻ ആദ്യം പ്രഖ്യാപിക്കേണ്ടതുണ്ട്. എന്നാൽ ഹോർമുസ് കടലിടുക്ക് തുറന്നതുകൊണ്ട് മാത്രം ഇറാന് മേലുള്ള സാമ്പത്തിക ഉപരോധങ്ങളിൽ ഇളവ് നൽകാൻ അമേരിക്ക തയ്യാറല്ലെന്നും ഉപരോധങ്ങൾ പിൻവലിക്കുന്നത് വരും ദിവസങ്ങളിലെ ഇറാന്റെ നിലപാടുകളെയും വ്യവസ്ഥകളെയും ആശ്രയിച്ചായിരിക്കുമെന്നും വിദേശകാര്യ സെക്രട്ടറി വ്യക്തമാക്കി.
