ഹോർമുസ് കടലിടുക്കിലൂടെ കടന്നുപോകുന്ന ചരക്കപ്പലുകൾക്ക് 20 ശതമാനം ടോൾ ഏർപ്പെടുത്താനുള്ള നീക്കത്തിൽനിന്ന് അമേരിക്കൻ പ്രസിഡന്റ് ഡോണാൾഡ് ട്രംപ് പിന്മാറി. ഗൾഫ് രാജ്യങ്ങളിലെ നേതാക്കളുമായി നടത്തിയ നിർണ്ണായക ചർച്ചകൾക്ക് ശേഷമാണ് ട്രംപിന്റെ പ്രഖ്യാപനം. ടോളിന് പകരം ഗൾഫ് രാജ്യങ്ങളുമായി സഹകരിച്ച് വൻകിട വ്യാപാര-നിക്ഷേപ കരാറുകളിൽ ഏർപ്പെടാൻ അമേരിക്ക തീരുമാനിച്ചു.
മധ്യപൂർവേഷ്യൻ സംഘർഷങ്ങളുടെ പശ്ചാത്തലത്തിൽ ഹോർമുസ് കടലിടുക്കിന്റെ സുരക്ഷ അമേരിക്ക ഏറ്റെടുക്കുമെന്നും, അതിന് പകരമായി 20 ശതമാനം റീഇംബേഴ്സ്മെന്റ് ഫീസ് ഈടാക്കുമെന്നുമായിരുന്നു ട്രംപ് നേരത്തെ അറിയിച്ചിരുന്നത്. എന്നാൽ പുതിയ കരാറുകളിലൂടെ അമേരിക്കയിലേക്ക് വലിയ തോതിൽ വിദേശ നിക്ഷേപം എത്തുമെന്നും, ഇത് ഇരുവിഭാഗത്തിനും ഒരുപോലെ പ്രയോജനകരമാകുമെന്നും ട്രംപ് വ്യക്തമാക്കി.
അതേസമയം, ഇറാൻ ഒഴികെയുള്ള എല്ലാ രാജ്യങ്ങളുടെയും ചരക്കുകപ്പലുകൾക്കായി ഹോർമുസ് കടലിടുക്ക് തുറന്നു നൽകിയിട്ടുണ്ട്. ഇറാന്റെ അക്രമാസക്തമായ നയങ്ങളാണ് അവർക്കെതിരെയുള്ള നടപടികൾക്ക് കാരണം. ഇറാനിയൻ തുറമുഖങ്ങളുമായി ബന്ധപ്പെടുന്നതും ഇറാനിയൻ ചരക്കുകൾ വഹിക്കുന്നതുമായ കപ്പലുകൾക്ക് പൂർണ്ണ ഉപരോധം തുടരുമെന്നും ട്രംപ് ഓർമ്മിപ്പിച്ചു.
പുതിയ നിക്ഷേപങ്ങളിലൂടെ അമേരിക്കയിൽ ദശലക്ഷക്കണക്കിന് തൊഴിലവസരങ്ങൾ സൃഷ്ടിക്കപ്പെടുമെന്നാണ് പ്രതീക്ഷിക്കുന്നത്. വൻകിട ഫാക്ടറികളും പ്ലാന്റുകളും രാജ്യത്തേക്ക് ഒഴുകിയെത്തുമെന്നും ഇറാന് ഒരു കാരണവശാലും ആണവായുധം നിർമ്മിക്കാൻ അനുവദിക്കില്ലെന്നും ട്രംപ് ട്രൂത്ത് സോഷ്യലിലൂടെ കൂട്ടിച്ചേർത്തു.
