ന്യൂഡല്ഹി: അയോധ്യ രാമക്ഷേത്രത്തില് ഉണ്ടായ വന് സംഭാവനക്കൊള്ളയില് പണം കടത്തിയതിനെക്കുറിച്ച് കൂടുതല് വിവരങ്ങള് പുറത്ത്. അറസ്റ്റിലായ എട്ടുപേരില് അഞ്ചുപേരും പണം എണ്ണുന്നതിനിടയില് വസ്ത്രത്തിലും സോക്സിലും ഒളിപ്പിക്കുന്ന ദൃശ്യങ്ങള് സിസിടിവിയിലൂടെ പുറത്തുവന്നു. ഇതോടെ ശ്രീരാമ ജന്മഭൂമി തീര്ഥക്ഷേത്ര ട്രസ്റ്റ് ജീവനക്കാര്ക്ക് പോക്കറ്റുകളില്ലാത്ത പ്രത്യേക യൂണിഫോം നിര്ബന്ധമാക്കി.
45 ദിവസത്തെ സിസിടിവി ദൃശ്യങ്ങളാണ് പരിശോധിച്ചത്. രാമക്ഷേത്രത്തിന് 200 മീറ്റര് അകലെയുള്ള പണം എണ്ണല് കേന്ദ്രത്തിലെ സിസിടിവി ദൃശ്യങ്ങളിലാണ് പണം മാറ്റുന്നതിന്റെ ദൃശ്യങ്ങള് ലഭിച്ചത്. ആരും ശ്രദ്ധിക്കാത്ത സമയത്ത് ചിലര് നോട്ടുകെട്ടുകള് വസ്ത്രത്തില് ഒളിപ്പിക്കുന്ന ദൃശ്യങ്ങളാണ് സിസിടിവിയിലുള്ളത്. ഇവരുമായി ബന്ധപ്പെട്ട സ്ഥലങ്ങളില് നടത്തിയ പരിശോധനകളില് പൊലീസ് പണം പിടിച്ചെടുത്തിരുന്നു.
180 ദിവസത്തെ സിസിടിവി ദൃശ്യങ്ങള് സൂക്ഷിക്കണമെന്നാണ് ചട്ടം. എന്നാല് 45 ദിവസത്തെ സിസിടിവി മാത്രമാണ് ഉണ്ടായിരുന്നത്. എത്രകാലമായി മോഷണം നടക്കുന്നു എന്നത് കണ്ടെത്താനായില്ല. ട്രസ്റ്റിന്റെ അഞ്ചുവര്ഷത്തെ അക്കൗണ്ടുകള് പ്രത്യേക അന്വേഷണ സംഘം വീണ്ടും ഓഡിറ്റ് ചെയ്യും.
ക്ഷേത്ര നിര്മാണവുമായി ബന്ധപ്പെട്ട ചെലവുകളും സംഭാവനകളായി ലഭിച്ച സ്വര്ണവും വെള്ളിയും മറ്റ് അമൂല്യവസ്തുക്കളും പരിശോധിക്കും. അതിനിടെ, പ്രതികളില് ഒരാളായ അവിനാശ് ശുക്ലയെ അയോധ്യയിലെ സ്പെഷ്യല് ഓപ്പറേഷന്സ് ഗ്രൂപ്പ് ഓഫീസില് ചോദ്യം ചെയ്തു. സംഭാവ കൊള്ളയില് ആര്എസ്എസ് ദുഃഖവും രോഷവും പ്രകടിപ്പിച്ചു. അന്വേഷണത്തില് കുറ്റക്കാരെന്ന് കണ്ടെത്തുന്നവര്ക്കെല്ലാം കടുത്ത ശിക്ഷ ഉറപ്പാക്കണമെന്നും ആര്എസ്എസ് വ്യക്തമാക്കി.
Financial theft at Ram Mandir: Money smuggled inside clothing; CCTV footage released.
