തിരുവനന്തപുരം: അതിവേഗ റെയില്പ്പാത സംബന്ധിച്ച് വിദഗ്ധ സമിതി നല്കിയ റിപ്പോര്ട്ട് പഠിച്ചശേഷം സര്ക്കാര് തുടര് നടപടികള് കൈക്കൊള്ളുമെന്നു മുഖ്യമന്ത്രി വിഡി സതീശന്. നിലവില് നല്കിയിരിക്കുന്ന രൂപരേഖ പ്രകാരം പദ്ധതി നടപ്പാക്കരുതെന്നാണ് വിദഗ്ധ സമിതിയുടെ ശുപാര്ശയെന്നും മുഖ്യമന്ത്രി പത്രസമ്മേളനത്തില് വ്യക്തമാക്കി. കെ റെയിലില് പറ്റിയ അബദ്ധം ആവര്ത്തിക്കരുതെന്നും മുഖ്യമന്ത്രി പറഞ്ഞു. മന്ത്രിസഭായോഗ തീരുമാനങ്ങള് വിശദീകരിക്കുകയായിരുന്നു മുഖ്യമന്ത്രി.
ഹൈ സ്പീഡ് പദ്ധതിയുമായി ബന്ധപ്പെട്ട് ഡല്ഹി മെട്രോ കോര്പ്പറേഷന് തയാറാക്കിയ റിപ്പോര്ട്ട് സര്ക്കാരിന് സമര്പ്പിച്ചിരുന്നതായി മുഖ്യമന്ത്രി പറഞ്ഞു. ഇതു പരിശോധിക്കാന് ധനകാര്യ വിദഗ്ധന്, റെയില്വേ വിദഗ്ധന്, പരിസ്ഥിതി പ്രവര്ത്തകന് എന്നിവര് അടങ്ങിയ സമിതിയെ ചുമതലപ്പെടുത്തി. ഗതാഗത സെക്രട്ടറിയും മുഖ്യമന്ത്രിയുടെ ഒഎസ്ഡിയും സമിതിയില് അംഗമായിരുന്നു. ഹൈ സ്പീഡ് പദ്ധതി റിപ്പോര്ട്ട് പൂര്ണമായ റിപ്പോര്ട്ട് അല്ലെന്നാണ് അവര് വിലയിരുത്തിയത്.
കൃത്യമായ സാധ്യതകള്, യാത്രക്കാരുടെ എണ്ണം എന്നിവ തിട്ടപ്പെടുത്താതിനാലും യാതൊരു വിധ പാരിസ്ഥിതിക പഠനവും നടത്താത്തതിനാലും ഈ രൂപത്തില് പദ്ധതി ഏറ്റെടുക്കാന് സാധിക്കില്ല. എന്നാല് ചില തുടര്നടപടികള് സമിതി ശുപാര്ശ ചെയ്യുന്നുണ്ട്. ആദ്യ ഘട്ടത്തില് സ്ഥലം പരിശോധന, ഭൂമി ഏറ്റെടുക്കലുമായി ബന്ധപ്പെട്ട വിജ്ഞാപനം തുടങ്ങി യാതൊരു പ്രാരംഭ നടപടികളും ഇപ്പോള് ആരംഭിക്കരുതെന്ന് സമിതി ശുപാര്ശ ചെയ്തിട്ടുണ്ട്. യാത്രക്കാരുടെ എണ്ണം, പാരിസ്ഥിതിക പഠനം തുടങ്ങിയവ നടത്താതെ, കെ റെയിലിന് പറ്റിയ അബദ്ധം ഇതില് ആവര്ത്തിക്കരുതെന്ന് സമിതി നിര്ദേശിച്ചിട്ടുണ്ട്.
High-speed rail line: Expert committee deems E. Sreedharan's report incomplete.
