ടെഹ്റാൻ: ഇറാന്റെ തെക്കുപടിഞ്ഞാറൻ മേഖലയിലുണ്ടായ കനത്ത അമേരിക്കൻ വ്യോമാക്രമണത്തെ തുടർന്ന് കുട്ടികളുടെ കാൻസർ ആശുപത്രി അടിയന്തരമായി ഒഴിപ്പിക്കേണ്ടി വന്ന പശ്ചാത്തലത്തിൽ, അമേരിക്കയുടേത് ക്രൂരവും മനുഷ്യത്വരഹിതവുമായ ആക്രമണമാണെന്ന് ഇറാൻ ആരോപിച്ചു. ആശുപത്രിക്ക് തൊട്ടടുത്ത് പതിച്ച മിസൈലുകൾ സൃഷ്ടിച്ച വൻ സ്ഫോടനങ്ങളെ തുടർന്നാണ് രോഗികളെ അടിയന്തരമായി മാറ്റേണ്ടി വന്നത്. ആരോഗ്യമേഖലയ്ക്ക് നേരെ ഇസ്രായേൽ നടത്തുന്ന ക്രൂരതകളെ ഓർമ്മിപ്പിക്കുന്നതാണ് അമേരിക്കയുടെ ഈ കിരാത നടപടിയെന്ന് ഇറാന്റെ വിദേശകാര്യ മന്ത്രാലയ വക്താവ് ഇസ്മായിൽ ബഗായ് തന്റെ ഔദ്യോഗിക എക്സ് പേജിൽ കുറിച്ചു.
ഈ അക്രമം ആശുപത്രിയിൽ ചികിത്സയിൽ കഴിഞ്ഞിരുന്ന പിഞ്ചുകുട്ടികളിൽ കടുത്ത ഭീതിയും മാനസിക പ്രയാസവുമാണ് ഉണ്ടാക്കിയതെന്നും അദ്ദേഹം കൂട്ടിച്ചേർത്തു. ആശുപത്രിയിൽ കീമോതെറാപ്പിക്ക് വിധേയരായിക്കൊണ്ടിരുന്ന 211 രോഗികളെയാണ് അടിയന്തര സാഹചര്യത്തിൽ സുരക്ഷിത സ്ഥാനങ്ങളിലേക്ക് മാറ്റിയത്. എന്നാൽ ഇറാന്റെ ഈ ഗുരുതരമായ ആരോപണങ്ങളോട് ഔദ്യോഗികമായി പ്രതികരിക്കാൻ അമേരിക്ക ഇതുവരെ തയ്യാറായിട്ടില്ല. വ്യോമാക്രമണങ്ങളെ തുടർന്ന് മേഖലയിൽ ഇപ്പോഴും യുദ്ധഭീതിയും അനിശ്ചിതാവസ്ഥയും നിലനിൽക്കുകയാണ്.
