ജെറൂസലേം: ഇസ്രായേലിന് നേരെ ഇറാന്റെ ഭാഗത്തുനിന്ന് ഇനിയൊരു വ്യോമാക്രമണമോ മറ്റ് പ്രകോപനങ്ങളോ ഉണ്ടായാൽ അതിശക്തമായ തിരിച്ചടി നൽകുമെന്ന് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു. ഇസ്രായേൽ പ്രധാനമന്ത്രിയുടെ ഓഫീസ് പുറത്തുവിട്ട വീഡിയോ സന്ദേശത്തിലാണ് ഇറാൻ നേതൃത്വത്തിന് അദ്ദേഹം ഈ കടുത്ത മുന്നറിയിപ്പ് നൽകിയത്. “ഞങ്ങൾക്കെതിരെ ആക്രമണം നടത്തിയാൽ കാര്യങ്ങൾ ശാന്തമായി തുടരുമെന്ന് ഇറാന്റെ നേതാക്കൾ ആരും കരുതേണ്ട,” നെതന്യാഹു വ്യക്തമാക്കി.
ശത്രുക്കൾ ഇസ്രായേലിനെ ആക്രമിക്കുകയും എന്നാൽ അതിന് തക്കതായ മറുപടി നൽകാതിരിക്കുകയും ചെയ്യുന്ന പഴയ നാളുകൾ കഴിഞ്ഞുപോയെന്ന് അദ്ദേഹം ഓർമ്മിപ്പിച്ചു. തങ്ങൾക്ക് നേരെ ഉയരുന്ന ഏത് നീക്കത്തിനും അതീവ നിർണായകവും മാരകവുമായ തിരിച്ചടിയായിരിക്കും ഇസ്രായേൽ നൽകുകയെന്നും അദ്ദേഹം കൂട്ടിച്ചേർത്തു. കഴിഞ്ഞ ജൂൺ 8-ന് ഇറാൻ നടത്തിയ മിസൈൽ ആക്രമണങ്ങൾക്ക് ശേഷം മേഖലയിൽ താൽക്കാലിക വെടിനിർത്തൽ പ്രഖ്യാപിച്ചിരുന്നെങ്കിലും, യു.എസ്-ഇറാൻ നയതന്ത്ര ചർച്ചകൾ തകർന്നതോടെ ഹോർമുസ് കടലിടുക്കിനെച്ചൊല്ലി വീണ്ടും യുദ്ധസാഹചര്യം ശക്തമായ പശ്ചാത്തലത്തിലാണ് നെതന്യാഹുവിന്റെ ഈ പുതിയ പ്രസ്താവന പുറത്തുവന്നിരിക്കുന്നത്.
