പ്രതിപക്ഷ ഉപനേതാവ് പദവിയിലെ തർക്കത്തിൽ സി.പി.ഐയും സി.പി.എമ്മും തമ്മിലുള്ള പോര് കടുക്കുന്നു. പ്രതിപക്ഷ ഉപനേതാവ് പദവി സി.പി.എമ്മിന് തന്നെയാകുമെന്ന പ്രതിപക്ഷ നേതാവ് പിണറായി വിജയന്റെ പ്രസ്താവനയ്ക്കെതിരെ രൂക്ഷ പ്രതികരണവുമായി സി.പി.ഐ. സംസ്ഥാന സെക്രട്ടറി ബിനോയ് വിശ്വം രംഗത്തെത്തി. പിണറായിയുടെ പ്രസ്താവന പദവിക്കും പക്വതയ്ക്കും നിരക്കുന്നതല്ലെന്ന് തുറന്നടിച്ച അദ്ദേഹം, തർക്കവിഷയത്തിലെ ഇത്തരം ഏകപക്ഷീയമായ നിലപാടുകൾ അംഗീകരിക്കാനാകില്ലെന്നും കൂട്ടിച്ചേർത്തു. സി.പി.ഐയുടെ അഭിമാനത്തിന് വിലയിടാൻ ഒരു നേതാവിനും കഴിയില്ലെന്നും ബിനോയ് വിശ്വം വ്യക്തമാക്കി.
ഇന്ന് രാവിലെ നടത്തിയ വാർത്താ സമ്മേളനത്തിലാണ് പ്രതിപക്ഷ ഉപനേതാവ് പദവി സി.പി.ഐയ്ക്ക് നൽകില്ലെന്ന് പിണറായി വിജയൻ ആവർത്തിച്ച് പ്രഖ്യാപിച്ചത്. സ്പീക്കർക്ക് നൽകുന്ന കത്തിൽ ഉപനേതാവായി നിർദ്ദേശിക്കുന്നത് സി.പി.എം. നേതാവിന്റെ പേരായിരിക്കുമെന്നും അദ്ദേഹം വ്യക്തമാക്കി. എൽ.ഡി.എഫിനെ പ്രതിസന്ധിയിലാക്കി മൂന്ന് മാസമായി തുടരുന്ന വിഷയത്തിൽ, എത്ര ദിവസം നീണ്ടാലും നിലപാട് മാറ്റാൻ സി.പി.എം. തയ്യാറല്ലെന്ന ഉറച്ച സന്ദേശമാണ് പിണറായി നൽകിയത്. എൽ.ഡി.എഫിലെ പദവികൾ ഏതെങ്കിലും പ്രത്യേക പാർട്ടിക്ക് മാത്രം അവകാശപ്പെട്ടതല്ലെന്ന നിലപാടിൽ സി.പി.ഐയും ഉറച്ചുനിൽക്കുന്നു.
പരസ്യമായി ഉന്നയിച്ച അവകാശവാദത്തിൽ നിന്ന് പിന്നോട്ട് പോകുന്നത് സി.പി.ഐക്കും, പദവി വിട്ടുകൊടുക്കുന്നത് സി.പി.എമ്മിനും അഭിമാനപ്രശ്നമായി മാറിയതോടെ ഇരുപാർട്ടികളും തമ്മിലുള്ള ഭിന്നത രൂക്ഷമായിരിക്കുകയാണ്. തർക്കം പരിഹരിക്കപ്പെടാത്തതിനെ തുടർന്ന് മുന്നണി യോഗം ചേരുന്നത് പോലും നിലവിൽ അനിശ്ചിതത്വത്തിലായിട്ടുണ്ട്.
