കർണാടകയിലെ കോൺഗ്രസ് സർക്കാരിന് കനത്ത തിരിച്ചടിയേകി മന്ത്രി ബി. നാഗേന്ദ്ര രാജിവെച്ചു. വാൽമീകി കോർപ്പറേഷൻ അഴിമതിക്കേസിൽ ആരോപണവിധേയനായതിനെ തുടർന്നാണ് അദ്ദേഹത്തിന്റെ രാജിവെപ്പ്. കേസിൽ നാഗേന്ദ്രയെ പ്രോസിക്യൂട്ട് ചെയ്യാൻ സി.ബി.ഐ ഗവർണറുടെ അനുമതി തേടുകയും, അതിന് ഗവർണർ അനുമതി നൽകാൻ ഒരുങ്ങുകയും ചെയ്യുന്നതിനിടെയാണ് അപ്രതീക്ഷിതമായി രാജി പ്രഖ്യാപനമുണ്ടായത്.
നേരത്തെ സിദ്ധരാമയ്യ സർക്കാരിൽ പട്ടികവർഗ്ഗ ക്ഷേമ മന്ത്രിയായിരുന്ന നാഗേന്ദ്ര, അഴിമതി ആരോപണം ഉയർന്നതിനെ തുടർന്ന് 2024 ജൂണിലും രാജിവെച്ചിരുന്നു. എന്നാൽ കേസിൽ അന്വേഷണം പുരോഗമിക്കവേ മന്ത്രിസഭാ പുനഃസംഘടനയിലൂടെ അദ്ദേഹത്തെ വീണ്ടും സ്റ്റാറ്റിസ്റ്റിക്സ് വകുപ്പ് മന്ത്രിയായി തിരിച്ചെടുത്തത് വലിയ രാഷ്ട്രീയ വിവാദങ്ങൾക്കും പ്രതിപക്ഷ പ്രതിഷേധങ്ങൾക്കും വഴിവെച്ചിരുന്നു. ഒടുവിൽ ഗവർണറുടെ പ്രോസിക്യൂഷൻ നടപടി ഉറപ്പായതോടെയാണ് അദ്ദേഹം വീണ്ടും രാജിയിലേക്ക് നീങ്ങിയത്.
കേസിന്റെ വിവരങ്ങളും ഇത് സർക്കാരിനുണ്ടാക്കുന്ന ആഘാതവും മുഖ്യമന്ത്രി ഡി.കെ. ശിവകുമാർ കോൺഗ്രസ് ഹൈക്കമാൻഡിനെ ധരിപ്പിച്ചിരുന്നു. ഇതിന് പിന്നാലെയാണ് രാജി തീരുമാനമുണ്ടായത്. പാർട്ടിക്കും സർക്കാരിനും ഗുണകരമാകുന്ന തീരുമാനമാണ് എടുത്തതെന്ന് കോൺഗ്രസ് ഹൈക്കമാൻഡ് വൃത്തങ്ങൾ വ്യക്തമാക്കിയതായി ദേശീയ മാധ്യമങ്ങൾ റിപ്പോർട്ട് ചെയ്തു.
