വാഷിംഗ്ടൺ: ഹോർമുസ് കടലിടുക്ക് പൂർണമായും തുറന്നിരിക്കുകയാണെന്നും യുഎസ് നാവികസേന മൈനുകൾ നീക്കം ചെയ്ത് ജലപാതയുടെ നിയന്ത്രണം ഏറ്റെടുത്തെന്നും അമേരിക്കൻ പ്രസിഡന്റ് ഡോണൾഡ് ട്രംപ് അവകാശപ്പെട്ടു. എന്നാൽ ട്രംപിന്റെ വാദങ്ങൾക്ക് വിരുദ്ധമായ കണക്കുകളാണ് അന്താരാഷ്ട്ര കപ്പൽ ഗതാഗത നിരീക്ഷണ ഏജൻസികൾ പുറത്തുവിടുന്നത്. കടലിടുക്കിലൂടെയുള്ള കപ്പൽ ഗതാഗതം ഇപ്പോഴും സാധാരണ നിലയിലേക്ക് തിരിച്ചെത്തിയിട്ടില്ലെന്നാണ് ലഭ്യമായ വിവരങ്ങൾ സൂചിപ്പിക്കുന്നത്.
മാരിടൈം ട്രാക്കിങ് പ്ലാറ്റ്ഫോമായ ‘മറൈൻ ട്രാഫിക്’ പുറത്തുവിട്ട കണക്കുകൾ പ്രകാരം ചൊവ്വാഴ്ച ഉച്ചവരെ ഏഴ് വലിയ കപ്പലുകൾ മാത്രമാണ് ഹോർമുസ് കടലിടുക്കിലൂടെ പേർഷ്യൻ ഉൾക്കടലിലേക്ക് പ്രവേശിച്ചത്. രണ്ട് എണ്ണ ടാങ്കറുകൾ, ഒരു ഗ്യാസ് ടാങ്കർ, മൂന്ന് ബൾക്ക് കാരിയറുകൾ, ഒരു ചരക്കുകപ്പൽ എന്നിവയാണ് ഇതിൽ ഉൾപ്പെടുന്നത്.
കടലിടുക്ക് മുറിച്ചുകടക്കാൻ മണിക്കൂറുകൾ ആവശ്യമായതിനാൽ ഒരു ദിവസം രേഖപ്പെടുത്തിയ കപ്പലുകളുടെ എണ്ണത്തിൽ പെട്ടെന്ന് വലിയ വർധനയുണ്ടാകാൻ സാധ്യതയില്ലെന്നും നിരീക്ഷകർ ചൂണ്ടിക്കാട്ടുന്നു. മാരിടൈം ഇന്റലിജൻസ് ഏജൻസിയായ കെപ്ലറിന്റെ കണക്കുകൾ പ്രകാരം തിങ്കളാഴ്ച ഹോർമുസ് കടലിടുക്കിലൂടെ ആകെ എട്ട് കപ്പലുകൾ മാത്രമാണ് കടന്നുപോയത്. ഇതിൽ അഞ്ച് കപ്പലുകൾ ഇറാന്റെ നിയന്ത്രണത്തിലുള്ള പാതയാണ് ഉപയോഗിച്ചത്.
ഈ കണക്കുകൾ ഹോർമുസ് കടലിടുക്കിലെ കപ്പൽ ഗതാഗതം ഇപ്പോഴും ഗുരുതരമായി പരിമിതപ്പെട്ടിരിക്കുകയാണെന്ന സൂചനയാണ് നൽകുന്നത്. അതിനാൽ തന്നെ കടലിടുക്കിന്റെ ‘പൂർണ നിയന്ത്രണം’ അമേരിക്ക ഏറ്റെടുത്തെന്ന ട്രംപിന്റെ അവകാശവാദവും യാഥാർഥ്യവും തമ്മിൽ വലിയ അന്തരമുണ്ടെന്നാണ് വിലയിരുത്തൽ. “ഇപ്പോൾ ഹോർമുസ് കടലിടുക്കിന്റെ നിയന്ത്രണമുള്ള ഒരേയൊരു ശക്തി അമേരിക്കൻ നാവികസേന മാത്രമാണ്,” ഓവൽ ഓഫീസിൽ മാധ്യമപ്രവർത്തകരോട് സംസാരിക്കവെ ട്രംപ് പറഞ്ഞു. യുഎസ് നാവികസേന മൈനുകൾ നീക്കം ചെയ്തതായും ജലപാത സുരക്ഷിതമാക്കിയതായും അദ്ദേഹം അവകാശപ്പെട്ടു.
സംഘർഷത്തിന് മുമ്പ് ആഗോള എണ്ണ വിതരണത്തിന്റെ അഞ്ചിലൊന്നോളം കടന്നുപോയിരുന്ന തന്ത്രപ്രധാന ജലപാതയായിരുന്നു ഹോർമുസ് കടലിടുക്ക്. പ്രതിദിനം ശരാശരി 120ഓളം കപ്പലുകൾ വരെ ഇതുവഴി സഞ്ചരിച്ചിരുന്ന സ്ഥാനത്താണ് ഇപ്പോൾ കപ്പൽ ഗതാഗതം ഏതാനും കപ്പലുകളിലേക്ക് ചുരുങ്ങിയിരിക്കുന്നത്. ഗതാഗതം സാധാരണ നിലയിലേക്ക് തിരിച്ചെത്തിയിട്ടില്ലെന്നതിന് ഇതും പ്രധാന തെളിവാണെന്നാണ് അന്താരാഷ്ട്ര മാരിടൈം നിരീക്ഷകരുടെ വിലയിരുത്തൽ.
