അലാസ്ക: അലാസ്ക തീരത്തോട് ചേര്ന്ന ബെറിംഗ് കടലിലെ അതിശൈത്യമുള്ള വെള്ളത്തില് മത്സ്യബന്ധന ബോട്ട് മറിഞ്ഞുണ്ടായ അപകടത്തില് 15 കാരന് അത്ഭുതകരമായി രക്ഷപ്പെട്ടു. ബോട്ട് മറിഞ്ഞതിന് പിന്നാലെ അതിന് മുകളില് കയറിയിരുന്ന ബാലനെ യുഎസ് കോസ്റ്റ് ഗാര്ഡ് രക്ഷപ്പെടുത്തി. എന്നാല് ഒപ്പമുണ്ടായിരുന്ന രണ്ട് പേരും അപകടത്തില് മരിച്ചു.
വെള്ളിയാഴ്ച സെന്റ് ലോറന്സ് ദ്വീപിലെ സാവൂംഗയില് നിന്ന് പുറപ്പെട്ട മത്സ്യബന്ധന ബോട്ട് ഞായറാഴ്ച പുലര്ച്ചെ തിരിച്ചെത്തേണ്ടതായിരുന്നു. എന്നാല് ഞായറാഴ്ച രാത്രിയിലും ബോട്ട് തിരിച്ചെത്താത്തതിനെ തുടര്ന്ന് അധികൃതര് തിരച്ചിലും രക്ഷാപ്രവര്ത്തനവും ആരംഭിച്ചു. മോശം കാലാവസ്ഥയെ തുടര്ന്ന് കോസ്റ്റ് ഗാര്ഡിന്റെ എച്ച് സി 130 ഹെര്ക്കുലീസ് വിമാനത്തിലെ സംഘത്തിന് തിങ്കളാഴ്ച മാത്രമാണ് തിരച്ചില് ആരംഭിക്കാന് കഴിഞ്ഞത്. തിങ്കളാഴ്ച രാവിലെ സെന്റ് ലോറന്സ് ദ്വീപില് നിന്ന് നാല് മൈല് അകലെ മറിഞ്ഞ ബോട്ടിന് മുകളില് ഇരിക്കുന്ന ബാലനെ ലെഫ്റ്റനന്റ് കമാന്ഡര് ജോനാഥന് റെഷ് കണ്ടെത്തുകയായിരുന്നു.
അതിശൈത്യവും ഏകദേശം 40 ഡിഗ്രി ഫാരന്ഹീറ്റ് താപനിലയുള്ള വെള്ളമുള്ളിടത്ത് ബാലന് രാത്രിയൊന്നാകെ അതിജീവിച്ചത് അത്ഭുതകരമാണെന്ന് റെഷ് പറഞ്ഞു. ബാലനെ കണ്ടെത്തിയ നിമിഷം രക്ഷാപ്രവര്ത്തകര്ക്ക് വലിയ സന്തോഷം നല്കിയെങ്കിലും മറ്റ് രണ്ട് പേരെ സമയത്ത് കണ്ടെത്താനാകാത്തതില് കടുത്ത ദുഃഖമുണ്ടെന്നും അദ്ദേഹം വ്യക്തമാക്കി. രക്ഷാപ്രവര്ത്തനത്തിനിടെ സമീപത്തുണ്ടായിരുന്ന ‘നോര്ത്ത്വെസ്റ്റ് എക്സ്പ്ലോറര്’ എന്ന കപ്പലിന്റെ സഹായവും കോസ്റ്റ് ഗാര്ഡ് തേടി. കപ്പല് എത്തുന്നതുവരെ മറിഞ്ഞ ബോട്ട് കൂടുതല് എളുപ്പത്തില് കണ്ടെത്തുന്നതിനായി ആകാശസംഘം വെള്ളത്തിലേക്ക് ഫ്ലെയറുകളും ലൈഫ് റാഫ്റ്റുകളും ഇറക്കി.
രക്ഷാപ്രവര്ത്തനത്തിന്റെ ദൃശ്യങ്ങളില് 15കാരന് മറിഞ്ഞ മത്സ്യബന്ധന ബോട്ടിന് മുകളില് മുട്ടുകുത്തിയിരിക്കുന്നതും പിന്നീട് ഹീവിങ് ലൈന് ഉപയോഗിച്ച് കപ്പലിലേക്ക് വലിച്ചുകയറ്റുന്നതും കാണാം. തുടര്ന്ന് നോര്ത്ത്വെസ്റ്റ് എക്സ്പ്ലോറര് കപ്പലില് ബാലനെ സുരക്ഷിതമായി എത്തിച്ചു. ഹൈപ്പോതെര്മിയയുടെ ലക്ഷണങ്ങള് ബാലനുണ്ടായിരുന്നുവെന്ന് കോസ്റ്റ് ഗാര്ഡ് അറിയിച്ചു. അപകടത്തില് മരിച്ച രണ്ട് പേരെയും വെള്ളത്തില് നിന്ന് പുറത്തെടുത്ത് ബാലനോടൊപ്പം അലാസ്കയിലെ നോമിലേക്ക് മാറ്റി. രക്ഷപ്പെട്ട ബാലന്റെയും മരിച്ചവരുടെയും പേരുകള് അധികൃതര് പുറത്തുവിട്ടിട്ടില്ല.
അപകടത്തില് മരിച്ച രണ്ട് നാവികരുടെ കുടുംബാംഗങ്ങള്ക്കും സുഹൃത്തുക്കള്ക്കും സമൂഹങ്ങള്ക്കും അനുശോചനം അറിയിക്കുന്നതായി ആര്ട്ടിക് ഡിസ്ട്രിക്ട് കമാന്ഡര് റിയര് അഡ്മിറല് ബോബ് ലിറ്റില് പറഞ്ഞു. ജീവന് രക്ഷിക്കാനായ രക്ഷാപ്രവര്ത്തനത്തില് നോര്ത്ത്വെസ്റ്റ് എക്സ്പ്ലോറര് കപ്പലിനൊപ്പം ഫെഡറല്, സ്റ്റേറ്റ്, ഗ്രാമതലത്തിലുള്ള ആദ്യ പ്രതികരണ സംഘങ്ങളും മറ്റ് ദൗത്യ പങ്കാളികളും നടത്തിയ നിര്ണായക ഇടപെടലുകളെയും അദ്ദേഹം അഭിനന്ദിച്ചു.
15-year-old miraculously survives after boat capsizes off Alaska coast; two dead.
