ഫ്‌ളോറിഡ: ഫ്‌ലോറിഡയില്‍ നടന്ന തിരഞ്ഞെടുപ്പ് പ്രചാരണ റാലിക്കിടെ പ്രതിഷേധക്കാരന്റെ തുടര്‍ച്ചയായ മുദ്രാവാക്യങ്ങളോട് രൂക്ഷമായി പ്രതികരിച്ച് യുഎസ് പ്രസിഡന്റ് ഡോണള്‍ഡ് ട്രംപ്. വെള്ളിയാഴ്ച ഫ്‌ളേറിഡയിലെ ഡേടോണ ബീച്ചില്‍ നടന്ന റാലിയില്‍ നാല് തവണയാണ് പ്രതിഷേധക്കാര്‍ ട്രംപിന്റെ പ്രസംഗം തടസ്സപ്പെടുത്തിയത്. ഇതോടെ പ്രകോപിതനായ ട്രംപ് ഒരു പ്രതിഷേധക്കാരനോട് ‘മിണ്ടാതിരിക്കൂ, മിണ്ടാതിരിക്കൂ. വിഡ്ഢി, തോല്‍വിക്കാരന്‍. ഇയാളെ ഇവിടെനിന്ന് പുറത്താക്കൂ എന്ന് ആക്രോശിച്ചു. നിര്‍ണായകമായ ഇടക്കാല തിരഞ്ഞെടുപ്പിന് മുന്നോടിയായി റിപ്പബ്ലിക്കന്‍ സ്ഥാനാര്‍ഥികള്‍ക്കായി വോട്ട് അഭ്യര്‍ഥിക്കുന്നതിനിടെയായിരുന്നു സംഭവം.
ഇടക്കാല തിരഞ്ഞെടുപ്പിന്റെ പ്രാധാന്യത്തെക്കുറിച്ച് സംസാരിക്കുമ്പോഴാണ് ആദ്യമായി പ്രതിഷേധം ഉയര്‍ന്നത്. ഇതോടെ പ്രസംഗം നിര്‍ത്തിയ ട്രംപ് പ്രതിഷേധക്കാരനു നേരെ തിരിഞ്ഞ് രൂക്ഷമായ ഭാഷയില്‍ പ്രതികരിക്കുകയായിരുന്നു. പിന്നീട് പ്രസംഗത്തിനിടെ വീണ്ടും തടസ്സങ്ങളുണ്ടായപ്പോള്‍ തന്റെ തമാശകള്‍ക്കും പ്രസംഗത്തിലെ പ്രധാന ഭാഗങ്ങള്‍ക്കും ഇടയില്‍ പ്രതിഷേധക്കാര്‍ ഇടപെടുകയാണെന്ന് ട്രംപ് പരാതിപ്പെട്ടു. ഇതിനിടെ സദസ്സിലുണ്ടായിരുന്ന അനുയായികള്‍ ഞങ്ങള്‍ നിങ്ങളെ സ്‌നേഹിക്കുന്നു എന്ന് മുദ്രാവാക്യം മുഴക്കി. ഇതിന് മറുപടിയായി എതിര്‍വശത്തുനിന്ന് മറ്റൊരു അഭിപ്രായം പറയാന്‍ ആരെങ്കിലും വരുന്നതുവരെ കാത്തിരിക്കുകയാണെന്നായിരുന്നു ട്രംപിന്റെ പരിഹാസം.
ഫ്‌ലോറിഡയിലെ ഓഷ്യന്‍ സെന്റര്‍ അരീനയില്‍ നടന്ന റാലിയില്‍ ആയിരക്കണക്കിന് ആളുകളാണ് പങ്കെടുത്തത്. ചൊവ്വാഴ്ച നടക്കാനിരിക്കുന്ന തിരഞ്ഞെടുപ്പില്‍ ഫ്‌ലോറിഡയിലെ റിപ്പബ്ലിക്കന്‍ സ്ഥാനാര്‍ഥികള്‍ക്ക് പിന്തുണ തേടിയായിരുന്നു ട്രംപിന്റെ പ്രസംഗം. ഗവര്‍ണര്‍ സ്ഥാനത്തേക്കുള്ള റിപ്പബ്ലിക്കന്‍ സ്ഥാനാര്‍ഥി ബൈറണ്‍ ഡൊണാള്‍ഡ്‌സിനും സെനറ്റര്‍ ആഷ്ലി മൂഡിക്കും വോട്ട് ചെയ്യണമെന്ന് അദ്ദേഹം അനുയായികളോട് ആവശ്യപ്പെട്ടു. വരാനിരിക്കുന്ന ഇടക്കാല തിരഞ്ഞെടുപ്പ് ചരിത്രത്തിലെ ഏറ്റവും നിര്‍ണായകമായ തിരഞ്ഞെടുപ്പായിരിക്കുമെന്നും അദ്ദേഹം അവകാശപ്പെട്ടു. യുഎസ് കോണ്‍ഗ്രസിന്റെ നിയന്ത്രണം ഏത് പാര്‍ട്ടിക്ക് ലഭിക്കുമെന്ന് ഈ തിരഞ്ഞെടുപ്പ് നിര്‍ണയിക്കും.
അതേസമയം, നേരത്തെ റദ്ദാക്കിയ അയോവ, കന്‍സാസ് പ്രചാരണ റാലികള്‍ ഞായറാഴ്ച നടത്തുമെന്ന് ട്രംപ് വെള്ളിയാഴ്ച പ്രഖ്യാപിച്ചു. നിശ്ചയിച്ചിരുന്ന വാരാന്ത്യ പരിപാടികള്‍ റദ്ദാക്കി 24 മണിക്കൂര്‍ തികയുംമുമ്പായിരുന്നു പുതിയ തീയതികള്‍ പ്രഖ്യാപിച്ചത്. എന്നാല്‍ ഫ്‌ലോറിഡയിലെ റാലി നേരത്തെ തീരുമാനിച്ച പ്രകാരം തന്നെ നടന്നു. ട്രംപിന്റെ ആരോഗ്യസ്ഥിതിയും പ്രചാരണ പരിപാടികളുടെ തിരക്കേറിയ സമയക്രമവും സംബന്ധിച്ച് റോയിട്ടേഴ്സ് മാധ്യമപ്രവര്‍ത്തകന്‍ ചോദ്യങ്ങള്‍ ഉന്നയിച്ചതിന് പിന്നാലെയായിരുന്നു റാലികള്‍ റദ്ദാക്കിയതെന്നതും ശ്രദ്ധേയമാണ്.
റിപ്പബ്ലിക്കന്‍ പാര്‍ട്ടിയുടെ തിരഞ്ഞെടുപ്പ് പ്രചാരണത്തിന് നിര്‍ണായകമായ ഘട്ടത്തിലാണ് ഫ്‌ലോറിഡയിലെ റാലിയില്‍ തുടര്‍ച്ചയായ പ്രതിഷേധങ്ങള്‍ അരങ്ങേറിയത്. ഇടക്കാല തിരഞ്ഞെടുപ്പില്‍ പാര്‍ട്ടിക്ക് കൂടുതല്‍ സീറ്റുകള്‍ നേടിക്കൊടുക്കുന്നതിനായി വോട്ടര്‍മാരെ സ്വാധീനിക്കാനുള്ള ശ്രമത്തിലാണ് ട്രംപ്. എന്നാല്‍ പ്രസംഗത്തിനിടെയുണ്ടായ തടസ്സങ്ങളും പ്രതിഷേധക്കാരോടുള്ള രൂക്ഷമായ പ്രതികരണവും റാലിയിലെ ശ്രദ്ധേയമായ സംഭവങ്ങളായി മാറി.
Donald Trump gets angry at a protester during a rally in Florida; ‘Shut up, you fool.’
