റിയാദ്: സൗദി അറേബ്യൻ തലസ്ഥാനമായ റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളത്തിന് നേരെ ഹൂതികൾ നടത്തിയ ഭീകരാക്രമണത്തിൽ 12 പേർ കൊല്ലപ്പെടുകയും 309 പേർക്ക് പരുക്കേൽക്കുകയും ചെയ്തു.ആക്രമണത്തിൽ കൊല്ലപ്പെട്ടവരിൽ നാല് സൗദി പൗരന്മാരും എട്ട് വിദേശികളും ഉൾപ്പെടുന്നു. ജനറൽ അതോറിറ്റി ഫോർ സിവിൽ ഏവിയേഷനാണ് (GACA) ഔദ്യോഗികമായി വിവരങ്ങൾ പുറത്തുവിട്ടത്.
ഇരകളിൽ 4 സൗദി പൗരന്മാരും 8 പ്രവാസികളും
കൊല്ലപ്പെട്ട വിദേശികളിൽ രണ്ടുപേർ ബംഗ്ലാദേശ് പൗരന്മാരാണ്. അമേരിക്ക, ഈജിപ്ത്, ജോർദാൻ, സിറിയ, ഫലസ്തീൻ, സുഡാൻ എന്നീ രാജ്യങ്ങളിൽ നിന്നുള്ള ഓരോ പൗരന്മാരുമാണ് മരണപ്പെട്ട മറ്റു വിദേശികൾ. പരുക്കേറ്റ 309 പേരിൽ ചിലരുടെ നില ഗുരുതരമായി തുടരുകയാണെന്നും ഇവർ വിവിധ ആശുപത്രികളിൽ വിദഗ്ധ ചികിത്സയിലാണെന്നും അതോറിറ്റി അറിയിച്ചു. ആക്രമണത്തിൽ വിമാനത്താവളത്തിലുണ്ടായ ഭൗതിക നാശനഷ്ടങ്ങൾ തിട്ടപ്പെടുത്തി വരികയാണെന്നും ജി.എ.സി.എ കൂട്ടിച്ചേർത്തു.
പൂർണ്ണ യുദ്ധക്കുറ്റമെന്ന് സഖ്യസേന; ശക്തമായ തിരിച്ചടി നൽകുമെന്ന് മുന്നറിയിപ്പ്
യാത്രാ ടെർമിനലുകളിൽ ഒന്നിലേക്ക് ഹൂതി തീവ്രവാദികൾ നടത്തിയ ആക്രമണം അന്താരാഷ്ട്ര മാനുഷിക നിയമങ്ങളുടെയും വ്യവസ്ഥകളുടെയും പരസ്യമായ ലംഘനവും പൂർണ്ണമായ യുദ്ധക്കുറ്റവുമാണെന്ന് യെമനിലെ നിയമപ്രകാരമുള്ള സർക്കാരിനെ പിന്തുണയ്ക്കുന്ന സഖ്യസേന വക്താവ് മേജർ ജനറൽ തുർക്കി അൽ-മാലകി വ്യക്തമാക്കി. മാനവിക തത്വങ്ങൾക്കും ധാർമ്മിക മൂല്യങ്ങൾക്കും നിരക്കാത്ത ക്രൂരമായ പ്രവൃത്തിയാണ് ഇതെന്ന് അദ്ദേഹം വിശേഷിപ്പിച്ചു. അന്താരാഷ്ട്ര നിയമങ്ങൾക്ക് വിധേയമായി തന്നെ ഈ ഭീകരാക്രമണത്തിന് സഖ്യസേനയുടെ സംയുക്ത കമാൻഡ് ശക്തമായ തിരിച്ചടി നൽകുമെന്നും മേജർ ജനറൽ മാൽക്കി മുന്നറിയിപ്പ് നൽകി.
