കീവ്: റഷ്യയും യുക്രൈനും തമ്മിലുള്ള നാലര വര്‍ഷത്തോളമായി തുടരുന്ന യുദ്ധത്തിന് പരിഹാരം കാണുന്നതിനായി ഈ മാസം തന്നെ പുതിയ ചര്‍ച്ചകള്‍ നടത്താന്‍ അമേരിക്ക ശ്രമിക്കുന്നതായി യുക്രൈന്‍ പ്രസിഡന്റ് വൊളോഡിമിര്‍ സെലന്‍സ്‌കി. ഒക്ടോബര്‍ അവസാനത്തോടെ യുക്രൈന്‍, റഷ്യ, അമേരിക്ക എന്നിവര്‍ പങ്കെടുക്കുന്ന ത്രികക്ഷി ചര്‍ച്ചകള്‍ നടത്താനാണ് അമേരിക്ക നിര്‍ദേശിച്ചതെന്ന് സെലന്‍സ്‌കി ഞായറാഴ്ച മാധ്യമങ്ങളോട് പറഞ്ഞു.
യുക്രൈന്‍-റഷ്യ സമാധാന ചര്‍ച്ചകള്‍ക്ക് നേതൃത്വം നല്‍കുന്ന അമേരിക്കയുടെ ശ്രമങ്ങള്‍ നിലവില്‍ കാര്യമായ പുരോഗതിയില്ലാത്ത സാഹചര്യത്തിലാണ് പുതിയ നീക്കം. ഇറാനുമായുള്ള യുദ്ധത്തിലേക്ക് വാഷിങ്ടണിന്റെ ശ്രദ്ധ മാറിയതും യുക്രൈനില്‍ റഷ്യ വ്യോമാക്രമണങ്ങള്‍ ശക്തമാക്കിയതുമാണ് ചര്‍ച്ചകള്‍ മന്ദഗതിയിലാകാന്‍ കാരണമായത്. ശനിയാഴ്ച അമേരിക്കന്‍ ചര്‍ച്ചാ പ്രതിനിധികളുമായി സംസാരിച്ചതായും സെലന്‍സ്‌കി വ്യക്തമാക്കി.
ഒക്ടോബര്‍ അവസാനത്തോടെ സാങ്കേതിക തലത്തിലുള്ള ത്രികക്ഷി കൂടിക്കാഴ്ച നടത്താനുള്ള നിര്‍ദേശമാണ് അമേരിക്ക മുന്നോട്ടുവച്ചതെന്ന് സെലന്‍സ്‌കി പറഞ്ഞു. ഈ സമയക്രമത്തെ പിന്തുണയ്ക്കാന്‍ യുക്രൈന്‍ തയ്യാറാണെന്ന് അമേരിക്കന്‍ പ്രതിനിധികളെ അറിയിച്ചതായും അദ്ദേഹം വ്യക്തമാക്കി. ചര്‍ച്ചകള്‍ എവിടെ നടത്തുമെന്ന കാര്യത്തില്‍ അന്തിമ തീരുമാനമായിട്ടില്ലെങ്കിലും യുഎഇയിലോ അമേരിക്ക നിര്‍ദേശിക്കുന്ന മറ്റേതെങ്കിലും രാജ്യത്തോ കൂടിക്കാഴ്ച നടത്താന്‍ യുക്രൈന്‍ തയ്യാറാണെന്നും സെലന്‍സ്‌കി അറിയിച്ചു.
റഷ്യന്‍ അധിനിവേശം അവസാനിപ്പിക്കുന്നതിനായി അമേരിക്കയുടെ മധ്യസ്ഥതയില്‍ മുമ്പും യുഎഇയില്‍ ചര്‍ച്ചകള്‍ നടന്നിട്ടുണ്ട്. ഒക്ടോബറില്‍ യുദ്ധം അവസാനിപ്പിക്കുന്നതിനുള്ള റഷ്യ-യുക്രൈന്‍-അമേരിക്ക ത്രികക്ഷി ചര്‍ച്ചകള്‍ക്ക് സാധ്യതയുണ്ടെന്ന് റഷ്യയും കഴിഞ്ഞ മാസം വ്യക്തമാക്കിയിരുന്നു. ഇത്തരമൊരു സാധ്യത തള്ളിക്കളയുന്നില്ലെന്നും സമീപഭാവിയില്‍ തന്നെ ചര്‍ച്ചകള്‍ നടക്കാമെന്നുമായിരുന്നു ക്രെംലിന്‍ വക്താവ് ദിമിത്രി പെസ്‌കോവ് അന്ന് പ്രതികരിച്ചത്.
അതേസമയം, മുന്‍ഘട്ട ചര്‍ച്ചകളില്‍ യുദ്ധം അവസാനിപ്പിക്കുന്നതിലേക്ക് കാര്യമായ പുരോഗതി കൈവരിക്കാന്‍ കഴിഞ്ഞിട്ടില്ല. പോരാട്ടം അവസാനിപ്പിക്കുന്നതിനായി മോസ്‌കോ മുന്നോട്ടുവയ്ക്കുന്ന കര്‍ശനമായ വ്യവസ്ഥകളില്‍ മാറ്റം വരുത്താന്‍ തയ്യാറാകാത്തതാണ് പ്രധാന തടസ്സങ്ങളിലൊന്നെന്നാണ് റിപ്പോര്‍ട്ട്. പുതിയ ചര്‍ച്ചകള്‍ യാഥാര്‍ഥ്യമാകുമോയെന്നും സമാധാന ശ്രമങ്ങള്‍ക്ക് എത്രത്തോളം മുന്നേറാനാകുമെന്നുമാണ് ഇനി ഉറ്റുനോക്കുന്നത്.
Russia-Ukraine Conflict: Zelenskyy says US is moving towards renewed talks.
