തിരുവനന്തപുരം: അനധികൃത സ്വത്ത് സമ്പാദന കേസിൽ കോട്ടയം വിജിലൻസ് കോടതി വിധിച്ച തടവുശിക്ഷ കേരള ഹൈക്കോടതി മരവിപ്പിച്ചതിനെ തുടർന്ന് മുൻ ഡി.ജി.പി. ടോമിൻ ജെ. തച്ചങ്കരി ജയിൽ മോചിതനായി. പൂജപ്പുര സെൻട്രൽ ജയിലിലായിരുന്നു അദ്ദേഹം തടവിൽ കഴിഞ്ഞിരുന്നത്.
കോട്ടയം വിജിലൻസ് കോടതി നാല് വർഷത്തെ കഠിനതടവും പിഴയും വിധിച്ചതിനെതിരെ ടോമിൻ തച്ചങ്കരി സമർപ്പിച്ച അപ്പീൽ പരിഗണിച്ചാണ് ഹൈക്കോടതി ബെഞ്ച് ശിക്ഷ മരവിപ്പിച്ചത്. ജസ്റ്റിസ് എ. ബദറുദ്ീന്റേതാണ് ഉത്തരവ്. വിധിക്കെതിരെയുള്ള അപ്പീൽ തീർപ്പാകുന്നതുവരെയാണ് കോടതിയുടെ ഇടക്കാല ഉത്തരവ്.
പിഴത്തുകയുടെ 75 ശതമാനം കെട്ടിവെക്കണമെന്നും, രണ്ട് ജാമ്യക്കാരുടെയും അഞ്ച് ലക്ഷം രൂപയുടെ ബോണ്ടിന്റെയും അടിസ്ഥാനത്തിൽ ജാമ്യം അനുവദിക്കാമെന്നും ഹൈക്കോടതി വ്യവസ്ഥ ചെയ്തിരുന്നു. കൂടാതെ മുൻകൂർ അനുമതിയില്ലാതെ രാജ്യത്തുനിന്ന് പുറത്തുപോകരുതെന്നും കോടതി കർശന നിർദ്ദേശം നൽകിയിട്ടുണ്ട്. നിയമപരമായ നടപടിക്രമങ്ങൾ പൂർത്തിയാക്കിയാണ് അദ്ദേഹം ജയിലിൽ നിന്ന് പുറത്തിറങ്ങിയത്.
