തിരഞ്ഞെടുപ്പ് കമ്മിഷന്റെ പ്രവർത്തനങ്ങളുമായി ബന്ധപ്പെട്ട വിവാദങ്ങളുടെ എല്ലാ വശങ്ങളും പരിശോധിക്കുമെന്ന് സുപ്രീം കോടതി വ്യക്തമാക്കി. പ്രത്യേക തീവ്ര തിരുത്തൽ പ്രക്രിയ (എസ്.ഐ.ആർ) നടപടികൾക്ക് അനുമതി നൽകിയത് ഏകകണ്ഠമായ തീരുമാനത്തിലൂടെയല്ലെന്ന ആരോപണം ഉൾപ്പെടെ കോടതിയുടെ പരിശോധനയിലുണ്ടാകും. തിരഞ്ഞെടുപ്പ് കമ്മിഷന്റെ പ്രവർത്തനങ്ങളെ ചോദ്യംചെയ്ത് സമർപ്പിച്ച ഹർജികൾ പരിഗണിക്കവേ, “ഞങ്ങൾക്കെല്ലാം അറിയാം, ഞങ്ങൾ പരിശോധിക്കും” എന്ന് ചീഫ് ജസ്റ്റിസ് സൂര്യകാന്ത് പ്രസ്താവിച്ചു.
എസ്.ഐ.ആർ നടപ്പാക്കാനുള്ള തീരുമാനം ഏകകണ്ഠമായിരുന്നുവെന്ന തിരഞ്ഞെടുപ്പ് കമ്മിഷന്റെ സത്യവാങ്മൂലത്തിന് മറുപടി നൽകാൻ ഹർജിക്കാർക്ക് സുപ്രീം കോടതി സമയമനുവദിച്ചിട്ടുണ്ട്. തുടർന്ന് കേസ് പരിഗണിക്കുന്നത് നവംബർ 17-ലേക്ക് മാറ്റി. ചീഫ് ജസ്റ്റിസ് സൂര്യകാന്ത്, ജസ്റ്റിസുമാരായ ജോയ്മല്യ ബാഗ്ചി, വി. മോഹന എന്നിവരടങ്ങിയ ബെഞ്ചാണ് കേസ് പരിഗണിച്ചത്. ലോക്‌സഭ പ്രതിപക്ഷ നേതാവ് രാഹുൽ ഗാന്ധിക്കും ഇന്ത്യ സഖ്യ നേതാക്കൾക്കും വേണ്ടി മുതിർന്ന അഭിഭാഷകൻ എ.എം. സിങ്‌വിയാണ് ഹാജരായത്. കമ്മിഷന്റെ തീരുമാനങ്ങൾ സുതാര്യമായിരുന്നോ എന്ന് വ്യക്തമാകാൻ ആശയവിനിമയങ്ങളും ഫയൽ കുറിപ്പുകളും സംരക്ഷിക്കാൻ നിർദേശം നൽകണമെന്ന് അദ്ദേഹം കോടതിയോട് ആവശ്യപ്പെട്ടു.
അതേസമയം, വിവിധ സംസ്ഥാനങ്ങളിലും കേന്ദ്രഭരണ പ്രദേശങ്ങളിലും എസ്.ഐ.ആർ നടത്തുന്നതിനുള്ള ഉത്തരവുകൾ പുറപ്പെടുവിച്ചത് അംഗങ്ങളുടെ ഏകകണ്ഠമായ തീരുമാനത്തോടെയാണെന്ന് വ്യക്തമാക്കി മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ്‌കുമാർ, തിരഞ്ഞെടുപ്പ് കമ്മിഷണർമാരായ സുഖ്ബീർ സിങ് സന്ധു, വിവേക് ജോഷി എന്നിവർ സുപ്രീംകോടതിയിൽ സത്യവാങ്മൂലം സമർപ്പിച്ചിരുന്നു. ഈ വിഷയത്തിലാണ് സുപ്രീം കോടതി ഹർജിക്കാരുടെ മറുപടി തേടിയിരിക്കുന്നത്.
