ടെക്‌സസ്: റിപ്പബ്ലിക്കന്‍ പാര്‍ട്ടിയുടെ ശക്തമായ സ്വാധീനമുള്ള ടെക്‌സാസില്‍, വര്‍ഷങ്ങളായി അസാധ്യമെന്ന് കരുതിയിരുന്ന ഒരു തിരഞ്ഞെടുപ്പ് വിജയം ഡെമോക്രാറ്റ് സ്ഥാനാര്‍ത്ഥി ജെയിംസ് തലറിക്കോ സ്വന്തമാക്കിയതായി എന്‍ബിസി ന്യൂസ് (NBC News) റിപ്പോര്‍ട്ട് ചെയ്യുന്നു. റിപ്പബ്ലിക്കന്‍ പാര്‍ട്ടി 38 വര്‍ഷങ്ങളായി കൈവശം വെച്ചിരുന്ന സെനറ്റ് സീറ്റ് പിടിച്ചെടുത്ത അദ്ദേഹം, അസാധാരണമായ ഒരു വിജയമാണ് കൈവരിച്ചത്. ലോകത്തിലെ ഏറ്റവും ധനികനായ വ്യക്തിയുടെ നേതൃത്വത്തില്‍ 168 ദശലക്ഷം ഡോളര്‍ ചെലവഴിച്ച് നടത്തിയ പ്രചാരണത്തെ അതിജീവിച്ച അദ്ദേഹം, ഡൊണാള്‍ഡ് ട്രംപ് മൂന്ന് തവണ വ്യക്തമായ ഭൂരിപക്ഷത്തോടെ വിജയിച്ച ഈ സംസ്ഥാനത്ത് ‘മാഗ’ (MAGA) പ്രസ്ഥാനത്തിന് ശക്തമായ തിരിച്ചടിയും നല്‍കിയിരിക്കുയാണ്
സംസ്ഥാന നിയമസഭാംഗമായ തലറിക്കോ, ട്രംപിന്റെ അടുത്ത അനുയായിയായ സ്റ്റേറ്റ് അറ്റോര്‍ണി ജനറല്‍ കെന്‍ പാക്സ്റ്റനെയാണ് പരാജയപ്പെടുത്തിയത്. സമ്പന്നരും ദരിദ്രരും തമ്മിലുള്ള അന്തരം, അഴിമതി തുടങ്ങിയ വിഷയങ്ങള്‍ ഉയര്‍ത്തിക്കാട്ടി അദ്ദേഹം ദേശീയ തലത്തില്‍ ശ്രദ്ധ നേടിയിരുന്നു. തന്റെ പാര്‍ട്ടിക്ക് വര്‍ഷങ്ങളായി വിജയിക്കാന്‍ കഴിയാതിരുന്ന ഈ സംസ്ഥാനത്ത്, പരമ്പരാഗത രാഷ്ട്രീയത്തിനപ്പുറം ചിന്തിക്കാന്‍ അദ്ദേഹം ശ്രമിച്ചു; ഒപ്പം തന്റെ ആശയങ്ങളില്‍ ക്രിസ്തീയ മൂല്യങ്ങളെയും അദ്ദേഹം സമന്വയിപ്പിച്ചു.
‘ഇടതും വലതും തമ്മിലുള്ള പോരാട്ടത്തിന് പകരം, മുകള്‍ത്തട്ടിലുള്ളവരും താഴെത്തട്ടിലുള്ളവരും തമ്മിലുള്ള പോരാട്ടം’ എന്ന ആശയമാണ് അദ്ദേഹം പ്രചാരണത്തിനായി മുന്നോട്ട് വെച്ചത്. അധികാരത്തിലിരിക്കുന്നവരെ ചോദ്യം ചെയ്യുന്നതിന് പകരം, രാജ്യത്തെ സാധാരണക്കാര്‍ പരസ്പരം പോരടിക്കണമെന്നാണ് ഏറ്റവും സമ്പന്നരായ 1% അമേരിക്കക്കാര്‍ ആഗ്രഹിക്കുന്നതെന്ന് അദ്ദേഹം തന്റെ അനുയായികളോട് പറഞ്ഞു.
വര്‍ഷങ്ങളായി വ്യക്തിപരമായ വിവാദങ്ങളെ നേരിടുന്ന പാക്സ്റ്റനെ, റിപ്പബ്ലിക്കന്‍ പാര്‍ട്ടിയിലെ സെനറ്റര്‍ ജോണ്‍ കോര്‍ണിനെ മറികടന്നുകൊണ്ട് ട്രംപ് പ്രൈമറി തിരഞ്ഞെടുപ്പില്‍ പിന്തുണച്ചു. എന്നാല്‍ പൊതുതിരഞ്ഞെടുപ്പില്‍, പ്രമുഖരായ പല റിപ്പബ്ലിക്കന്‍ നേതാക്കളും പാക്സ്റ്റനെ പിന്തുണയ്ക്കുന്നതിന് പകരം പരസ്യമായി തലാരിക്കോയ്ക്ക് പിന്തുണ പ്രഖ്യാപിച്ചു.
Democratic upset in Texas: James Talarico heads to the Senate, rewriting 38 years of history.
