വാഷിംഗ്ടണ്‍: റിപ്പബ്ലിക്കന്‍സ് പാര്‍ട്ടിയ്ക്കും ഡമോക്രാറ്റിനും നിര്‍ണായകമായ ഇടക്കാല തെരഞ്ഞെടുപ്പില്‍ ഇരു പക്ഷവും പോരാട്ടവീര്യം കൂടുതല്‍ ശക്തമായതോടെ അമേരിക്കന്‍ രാഷ്ട്രീയ രംഗം കൂടുതല്‍ കലുഷിതമാകുന്നു. നവംബര്‍ മൂന്നിനു നടക്കുന്ന ഇടക്കാല തെരഞ്ഞെടുപ്പിന്റെ ഭാഗമായി കാലിഫോര്‍ണിയയിലെ തപാല്‍ വോട്ടുകള്‍ തടയാനുള്ള ട്രംപിന്റെ നീക്കം സുപ്രീം കോടതി തള്ളിയത് പ്രസിഡന്‍് ട്രംപിന് പ്രഹരമായി.
കാലിഫോര്‍ണിയയിലെ തപാല്‍ വോട്ടുകള്‍ എണ്ണുന്നത് തടയണമെന്ന പ്രസിഡന്റ് ഡൊണാള്‍ഡ് ട്രംപിന്റെ ആവശ്യം സുപ്രീംകോടതി തള്ളി. 20,000-ത്തിലധികം വോട്ടര്‍മാരുടെ തപാല്‍ വോട്ടുകള്‍ മാറ്റിവെക്കണമെന്നായിരുന്നു ട്രംപ് ഭരണകൂടത്തിന്റെ ആവശ്യം. എന്നാല്‍ ഈ നീക്കം തടയാന്‍ നേരത്തെ ഫെഡറല്‍ കോടതി ഉത്തരവിട്ടിരുന്നു. ഇതിന് പിന്നാലെയാണ് സുപ്രീംകോടതിയും ട്രംപിന്റെ ആവശ്യം നിരസിച്ചത്. തിരഞ്ഞെടുപ്പിന് മുന്നോടിയായി രാജ്യത്തെ അഭിസംബോധന ചെയ്ത ട്രംപ് അമേരിക്കയുടെ സമ്പദ്വ്യവസ്ഥ കുതിച്ചുയരുകയാണെന്നും അവകാശപ്പെട്ടു.
നവംബര്‍ മൂന്നിന് നടക്കുന്ന ഇടക്കാല തിരഞ്ഞെടുപ്പില്‍ അമേരിക്കന്‍ കോണ്‍ഗ്രസിന്റെ നിയന്ത്രണം ആര്‍ക്കായിരിക്കുമെന്നതാണ് പ്രധാന ചോദ്യം. ജനപ്രതിനിധിസഭയിലെ 435 സീറ്റുകളിലേക്കും സെനറ്റിലെ 100 സീറ്റുകളില്‍ 35 എണ്ണത്തിലേക്കുമാണ് തിരഞ്ഞെടുപ്പ് നടക്കുന്നത്. ഏകദേശം 21 കോടി ആളുകളാണ് വോട്ടര്‍പട്ടികയിലുള്ളത്. നിലവില്‍ ജനപ്രതിനിധിസഭയിലും സെനറ്റിലും റിപ്പബ്ലിക്കന്‍ പാര്‍ട്ടിക്കാണ് ഭൂരിപക്ഷം. ഈ സാഹചര്യത്തില്‍ ഏതെങ്കിലും ഒരു സഭയിലെങ്കിലും ഭൂരിപക്ഷം നേടാനായാല്‍ ട്രംപിന്റെ ഭരണത്തിന്റെ ശേഷിക്കുന്ന കാലയളവില്‍ നയപരമായ തീരുമാനങ്ങളെ സ്വാധീനിക്കാന്‍ ഡെമോക്രാറ്റുകള്‍ക്ക് സാധിക്കും.
മിഷിഗണ്‍ സെനറ്റ് തിരഞ്ഞെടുപ്പും അവസാനഘട്ടത്തില്‍ ശ്രദ്ധാകേന്ദ്രമായി. ഡെമോക്രാറ്റിക് കോണ്‍ഗ്രസ് അംഗം ഹേലി സ്റ്റീവന്‍സ് റിപ്പബ്ലിക്കന്‍ സ്ഥാനാര്‍ഥി മൈക്ക് റോജേഴ്സിന് പിന്തുണ പ്രഖ്യാപിച്ചതാണ് രാഷ്ട്രീയ ചര്‍ച്ചകള്‍ക്ക് വഴിവെച്ചത്. ഡെമോക്രാറ്റിക് പ്രൈമറിയില്‍ സ്റ്റീവന്‍സിനെ പരാജയപ്പെടുത്തിയ അബ്ദുല്‍ എല്‍സയേദാണ് പാര്‍ട്ടിയുടെ ഔദ്യോഗിക സ്ഥാനാര്‍ഥി. സെനറ്റിലേക്ക് തിരഞ്ഞെടുക്കപ്പെട്ടാല്‍ ആദ്യ മുസ്ലിം സെനറ്ററാകാന്‍ എല്‍സയേദിന് അവസരം ലഭിക്കും.
തിരഞ്ഞെടുപ്പിന് മുന്നോടിയായി ജോര്‍ജിയയില്‍ വോട്ടര്‍മാരുടെ പങ്കാളിത്തത്തിലും വര്‍ധന രേഖപ്പെടുത്തി. സംസ്ഥാനത്തെ രജിസ്റ്റര്‍ ചെയ്ത വോട്ടര്‍മാരില്‍ മൂന്നിലൊന്ന് പേരും നേരത്തെ വോട്ട് രേഖപ്പെടുത്തിയിട്ടുണ്ട്. റിപ്പബ്ലിക്കന്‍ പാര്‍ട്ടിക്കാരുടെ ആവേശം വോട്ടെടുപ്പിന് അനുസൃതമായി പ്രകടമാകുന്നില്ലെന്ന് ജനപ്രതിനിധിസഭാ സ്പീക്കര്‍ മൈക്ക് ജോണ്‍സണ്‍ അഭിപ്രായപ്പെട്ടു. എണ്ണവിലയിലുണ്ടായ കുറവ് വോട്ടര്‍മാരുടെ ശ്രദ്ധയില്‍പ്പെടുമെന്നാണ് ട്രംപിന്റെ പ്രതീക്ഷ. ഇന്ധനവിലയും ജീവിതച്ചെലവും തിരഞ്ഞെടുപ്പില്‍ പ്രധാന ചര്‍ച്ചാവിഷയങ്ങളായി തുടരുകയാണ്.
ഇതിനിടെ, ഇറാനുമായുള്ള സംഘര്‍ഷം അവസാനിപ്പിക്കുന്നതിനുള്ള കരാര്‍ സംബന്ധിച്ചും അമേരിക്കന്‍ ഭരണകൂടത്തില്‍നിന്ന് സൂചനകളുണ്ടായി. ഇറാനുമായി ധാരണയിലെത്താന്‍ കര്‍ശനമായ സമയപരിധിയില്ലെന്നും ടെഹ്റാനുമായി നല്ല ചര്‍ച്ചകള്‍ നടന്നുവരികയാണെന്നും വൈസ് പ്രസിഡന്റ് ജെ.ഡി. വാന്‍സ് വ്യക്തമാക്കി. ഫെബ്രുവരിയില്‍ ആരംഭിച്ച അമേരിക്ക-ഇറാന്‍ സംഘര്‍ഷം ആഗോള എണ്ണവിലയില്‍ വലിയ സ്വാധീനം ചെലുത്തിയിരുന്നു. കോണ്‍ഗ്രസിന്റെ നിയന്ത്രണം നിര്‍ണയിക്കുന്ന ഈ തിരഞ്ഞെടുപ്പ് ട്രംപിന്റെ ശേഷിക്കുന്ന ഭരണകാലത്തെ രാഷ്ട്രീയ ദിശയെയും അമേരിക്കയുടെ ആഭ്യന്തര-വിദേശ നയങ്ങളെയും സ്വാധീനിക്കുന്ന നിര്‍ണായക സംഭവമായി മാറുകയാണ്
Setback for Trump in court: Supreme Court rejects request to halt the counting of mail-in ballots in California.
