വാഷിംഗ്ടണ്‍: 2020ലെ പ്രസിഡന്റ് തെരഞ്ഞെടുപ്പില്‍ ജോ ബൈഡനോട് ഏറ്റ പരാജയം ഇന്നും അംഗീകരിക്കാത്ത പ്രസിഡന്റ് ഡോണല്‍ഡ് ട്രംപ് ഇത്തവണ ഇടക്കാല തെരഞ്ഞെടുപ്പിലെ റിപ്പബ്ലിക്കന്‍ തോല്‍വിയെ അംഗീകരിച്ചുവെന്നത് ശ്രദ്ധേയമായി.
അമേരിക്കന്‍ രാഷ്ട്രീയത്തില്‍ ഒരു പതിറ്റാണ്ടിലേറെയായി പതിവ് രാഷ്ട്രീയ നിയമങ്ങളെ വെല്ലുവിളിച്ചിരുന്ന ഡോണള്‍ഡ് ട്രംപിന് ഇത്തവണ വോട്ടര്‍മാരുടെ പക്കല്‍ നിന്നും ലഭിച്ചത് ശക്തമായ തിരിച്ചടിയാണ്.
വിവാദങ്ങളും ഇംപീച്ച്മെന്റ് നടപടികളും ക്രിമിനല്‍ കേസിലെ ശിക്ഷാവിധിയും അതിജീവിച്ച് മുന്നോട്ടുപോയ ട്രംപ്, തന്റെ വ്യക്തിപ്രഭാവംകൊണ്ട് ഏത് പ്രതിസന്ധിയും മറികടക്കാമെന്ന ആത്മവിശ്വാസത്തിലായിരുന്നു. എന്നാല്‍ രണ്ടാം ഭരണകാലത്തിന്റെ ആദ്യ പകുതിയില്‍ നടപ്പാക്കിയ നയങ്ങള്‍ക്കെതിരെ ജനവികാരം ശക്തമായതോടെ ഇത്തവണ വോട്ടര്‍മാരുടെ പിന്തുണ നേടാന്‍ അദ്ദേഹത്തിന് കഴിഞ്ഞില്ല. ഏകപക്ഷീയമായ ഇറക്കുമതി തീരുവകള്‍, ഇറാനുമായുള്ള യുദ്ധം, ഇന്ധനവിലയിലെ വര്‍ധന, ജീവിതച്ചെലവിലെ പ്രതിസന്ധി എന്നിവ ഭരണകൂടത്തിനെതിരായ ജനരോഷം വര്‍ധിപ്പിച്ചു. സാമ്പത്തിക ബുദ്ധിമുട്ടുകള്‍ നേരിടുന്ന ജനങ്ങളെ അവഗണിച്ച് വൈറ്റ് ഹൗസിലെ നവീകരണ പദ്ധതികള്‍ക്കും മറ്റ് വിവാദപരമായ നീക്കങ്ങള്‍ക്കും മുന്‍ഗണന നല്‍കിയെന്ന വിമര്‍ശനവും ശക്തമായി.
റിപ്പബ്ലിക്കന്‍ പാര്‍ട്ടിക്ക് നേരിട്ട തിരിച്ചടി 1974ലെ വാട്ടര്‍ഗേറ്റ് വിവാദത്തിന് പിന്നാലെ നടന്ന തെരഞ്ഞെടുപ്പിനെയും 1994ലെ അമേരിക്കന്‍ രാഷ്ട്രീയ മാറ്റത്തെയും ഓര്‍മിപ്പിക്കുന്നതാണെന്നാണ് വിലയിരുത്തല്‍. അഴിമതിയുമായി ബന്ധപ്പെട്ട വിവാദങ്ങള്‍ പൊതുപ്രവര്‍ത്തകരോടുള്ള ജനവിശ്വാസത്തെ ബാധിക്കുമെന്ന് മുന്‍ ചിക്കാഗോ മേയറും ഡെമോക്രാറ്റിക് നേതാവുമായ റഹം ഇമ്മാനുവല്‍ പ്രതികരിച്ചു. സെനറ്റില്‍ സൗത്ത് കരോലിന, ടെക്‌സസ്, കാന്‍സസ് തുടങ്ങിയ പരമ്പരാഗത റിപ്പബ്ലിക്കന്‍ ശക്തികേന്ദ്രങ്ങളിലും ഡെമോക്രാറ്റുകള്‍ മുന്നേറ്റമുണ്ടാക്കി. ജോര്‍ജിയയില്‍ കറുത്തവര്‍ഗക്കാരിയായ വനിത ഗവര്‍ണറാകുമ്പോള്‍ ടെക്‌സസില്‍ ലാറ്റിന വംശജയായ വനിത ഗവര്‍ണര്‍ സ്ഥാനത്തെത്തും. ജോര്‍ജിയയില്‍ കീഷ ലാന്‍സ് ബോട്ടംസ് ഗവര്‍ണര്‍ തെരഞ്ഞെടുപ്പില്‍ മികച്ച വിജയം നേടിയപ്പോള്‍ ടെക്‌സസില്‍ ജിന ഹിനോജോസയും വിജയിച്ചു. 1988നുശേഷം ആദ്യമായി ടെക്‌സസില്‍ ഡെമോക്രാറ്റിക് സ്ഥാനാര്‍ഥി സെനറ്റിലേക്ക് തെരഞ്ഞെടുക്കപ്പെട്ടതും ശ്രദ്ധേയമായി. റിപ്പബ്ലിക്കന്‍ സ്ഥാനാര്‍ഥി കെന്‍ പാക്സ്റ്റണെ പരാജയപ്പെടുത്തിയാണ് ജെയിംസ് തലാരിക്കോ ഈ നേട്ടം സ്വന്തമാക്കിയത്.
2020ലെ പ്രസിഡന്റ് തെരഞ്ഞെടുപ്പ് ഫലം അംഗീകരിക്കാന്‍ വിസമ്മതിച്ചിരുന്ന ട്രംപ് ഇത്തവണ തെരഞ്ഞെടുപ്പ് ഫലത്തെ ചോദ്യം ചെയ്യാതിരുന്നതും രാഷ്ട്രീയ നിരീക്ഷകരുടെ ശ്രദ്ധ നേടി. 2027 മുതല്‍ ജനപ്രതിനിധിസഭയിലും സെനറ്റിലും ഡെമോക്രാറ്റുകള്‍ക്ക് നിയന്ത്രണം ലഭിക്കുന്നതോടെ വാഷിങ്ടണിലെ ഭരണനയങ്ങളില്‍ മാറ്റം വരുത്താനുള്ള ജനവിധിയാണ് ലഭിച്ചതെന്ന് പാര്‍ട്ടി നേതാക്കള്‍ അവകാശപ്പെടുന്നു. എന്നാല്‍ പ്രസിഡന്റ് വീറ്റോ അധികാരം ഉപയോഗിച്ച് ഡെമോക്രാറ്റുകളുടെ നിയമനിര്‍മാണ നീക്കങ്ങള്‍ തടയാന്‍ കഴിയുമെന്നത് പുതിയ ഭരണസമവാക്യങ്ങളില്‍ വെല്ലുവിളിയാകും. അതേസമയം, തെരഞ്ഞെടുപ്പില്‍ പരാജയപ്പെട്ട റിപ്പബ്ലിക്കന്‍ നേതാക്കള്‍ ട്രംപിനെതിരെ കൂടുതല്‍ തുറന്ന വിമര്‍ശനങ്ങളുമായി രംഗത്തെത്തുമെന്നാണ് സൂചന. സൗത്ത് കരോലിനയിലെ ഡാര്‍ലിന്‍ ഗ്രഹാം, നോര്‍ത്ത് കരോലിനയിലെ മൈക്കല്‍ വാട്ട്‌ലി, ടെക്‌സസിലെ കെന്‍ പാക്സ്റ്റണ്‍ തുടങ്ങിയ ട്രംപ് പിന്തുണച്ച സ്ഥാനാര്‍ഥികള്‍ പരാജയപ്പെട്ടതും തിരിച്ചടിയുടെ വ്യാപ്തി വ്യക്തമാക്കുന്നു. യുവാക്കള്‍, കറുത്തവര്‍ഗക്കാര്‍, ലാറ്റിനോ വോട്ടര്‍മാര്‍ എന്നിവരടങ്ങിയ വിഭാഗങ്ങളുടെ പിന്തുണയും ഇത്തവണ ഡെമോക്രാറ്റുകള്‍ക്ക് അനുകൂലമായി മാറി.
റിപ്പബ്ലിക്കന്‍ സ്ഥാനാര്‍ഥികള്‍ക്കായി ട്രംപ് 250 ദശലക്ഷം ഡോളറിലധികം ചെലവഴിച്ചിട്ടും തെരഞ്ഞെടുപ്പിലെ പരാജയം തടയാനായില്ല. ഇലോണ്‍ മസ്‌ക് ഉള്‍പ്പെടെയുള്ള പ്രമുഖ സംഭാവനദാതാക്കളില്‍നിന്നും വലിയ തുകകള്‍ ലഭിച്ചിരുന്നു. എന്നാല്‍ വിവാദപരമായ പ്രചാരണരീതികളും വ്യക്തിഹത്യാ സ്വഭാവമുള്ള രാഷ്ട്രീയ പ്രചാരണങ്ങളും വോട്ടര്‍മാരില്‍ സ്വാധീനം ചെലുത്തിയില്ലെന്നാണ് ഫലം സൂചിപ്പിക്കുന്നത്. ഒഹായോയില്‍ റിപ്പബ്ലിക്കന്‍ സ്ഥാനാര്‍ഥി വിവേക് രാമസ്വാമിയുടെ വിവാദ പരസ്യവും തിരിച്ചടിയായി. അതേസമയം, വിസ്‌കോണ്‍സിനില്‍ 2020ലെ പ്രസിഡന്റ് തെരഞ്ഞെടുപ്പ് ഫലത്തിന്റെ അംഗീകാരത്തെ എതിര്‍ത്തിരുന്ന റിപ്പബ്ലിക്കന്‍ സ്ഥാനാര്‍ഥി ടോം ടിഫാനി പരാജയം അംഗീകരിച്ചു. ഡെമോക്രാറ്റുകള്‍ മികച്ച പ്രവര്‍ത്തനം കാഴ്ചവെച്ചെന്നും സ്വന്തം പാര്‍ട്ടിയിലെ സ്ഥാനാര്‍ഥികളാണ് പരാജയത്തിന് ഉത്തരവാദികളെന്നും ട്രംപും പ്രതികരിച്ചു. എപി വോട്ടര്‍ പോള്‍ പ്രകാരം രാജ്യത്തിന്റെ നിലവിലെ അവസ്ഥയില്‍ ഏകദേശം 75 ശതമാനം വോട്ടര്‍മാരും അസന്തുഷ്ടരോ രോഷാകുലരോ ആണ്.
വന്‍ വിജയത്തിന് പിന്നാലെ ഡെമോക്രാറ്റുകള്‍ക്ക് മുന്നിലുള്ള പ്രധാന വെല്ലുവിളി ഭരണപരമായ വാഗ്ദാനങ്ങള്‍ നടപ്പാക്കുകയെന്നതാണ്. ട്രംപ് ഭരണകൂടത്തിനെതിരെ അന്വേഷണം നടത്തുമെന്നും ആരോഗ്യരംഗത്തെ പരിഷ്‌കാരങ്ങള്‍, ജീവിതച്ചെലവ് കുറയ്ക്കല്‍, പ്രസിഡന്റിന്റെ അധികാരങ്ങള്‍ക്ക് നിയന്ത്രണം ഏര്‍പ്പെടുത്തല്‍ തുടങ്ങിയ വിഷയങ്ങളില്‍ നിയമനിര്‍മാണം നടത്തുമെന്നും പാര്‍ട്ടി പ്രഖ്യാപിച്ചിട്ടുണ്ട്. എന്നാല്‍ ട്രംപിനെതിരെ ഇംപീച്ച്മെന്റ് നടപടികള്‍ ആവശ്യപ്പെടുന്ന വിഭാഗങ്ങളുടെ സമ്മര്‍ദം പാര്‍ട്ടിയുടെ പ്രവര്‍ത്തനങ്ങളെ ബാധിച്ചേക്കാം. ജനങ്ങളുടെ ജീവിതച്ചെലവ് കുറയ്ക്കുന്നതിനുള്ള നടപടികളാണ് പുതിയ ജനവിധിയുടെ പ്രധാന സന്ദേശമെന്ന് ഫ്‌ലോറിഡയില്‍നിന്നുള്ള ഡെമോക്രാറ്റിക് നേതാവ് ജാറഡ് മൊസ്‌കോവിറ്റ്‌സ് പറഞ്ഞു. ഡെമോക്രാറ്റുകള്‍ അവതരിപ്പിക്കുന്ന നിയമങ്ങള്‍ ട്രംപ് വീറ്റോ ചെയ്താല്‍ അതിന്റെ ഉത്തരവാദിത്തം പ്രസിഡന്റിനായിരിക്കുമെന്നും അദ്ദേഹം പ്രതികരിച്ചു. തെരഞ്ഞെടുപ്പില്‍ ട്രംപിനെതിരായ ജനവികാരം പ്രകടമായെങ്കിലും അതിനെ ഫലപ്രദമായ ഭരണനേട്ടങ്ങളാക്കി മാറ്റാന്‍ ഡെമോക്രാറ്റുകള്‍ക്ക് കഴിയുമോ എന്നതാണ് ഇനി അമേരിക്കന്‍ രാഷ്ട്രീയത്തില്‍ നിര്‍ണായകമാകുന്നത്.
Trump, who still has not acknowledged his defeat to Joe Biden in the presidential election, promptly accepted his defeat in the midterm elections.
