ഹോർമുസ് കടലിടുക്ക് നിശ്ചലമായി തുടരുന്നു: മൂന്നാം ദിനവും കപ്പലുകൾ പാതിവഴിയിൽ, ഭീഷണിയുമായി ഇറാൻ സേന

ടെഹ്റാൻ: അമേരിക്കയും ഇറാനും തമ്മിലുള്ള തർക്കം മുറുകുന്ന സാഹചര്യത്തിൽ ലോകത്തെ ഏറ്റവും നിർണ്ണായകമായ സമുദ്രപാതയായ ഹോർമുസ് കടലിടുക്ക് മൂന്നാം ദിവസവും വിജനമായി തുടരുന്നു. പേർഷ്യൻ ഗൾഫിലേക്കുള്ള കപ്പൽ ഗതാഗതം സംബന്ധിച്ച അനിശ്ചിതത്വം നിലനിൽക്കുന്നതിനാൽ ഭൂരിഭാഗം കപ്പലുകളും യാത്ര ഉപേക്ഷിച്ചിരിക്കുകയാണ്. കഴിഞ്ഞ ഏതാനും മണിക്കൂറുകൾക്കുള്ളിൽ രണ്ട് ഒഴിഞ്ഞ ടാങ്കറുകൾ ഉൾപ്പെടെ മൂന്ന് കപ്പലുകൾ മാത്രമാണ് ഗൾഫ് മേഖലയിലേക്ക് പ്രവേശിച്ചതെന്നാണ് മറൈൻ ട്രാഫിക് വിവരങ്ങൾ വ്യക്തമാക്കുന്നത്.തിങ്കളാഴ്ച പുലർച്ചെ ‘നോവ ക്രസ്റ്റ്’ എന്ന തുർക്കിഷ് ഓപ്പറേറ്ററുടെ ടാങ്കർ ചരക്കുമായി കടലിടുക്ക് കടന്ന് പുറത്തുവന്നിട്ടുണ്ട്. റഷ്യൻ എണ്ണ കടത്തിയതുമായി ബന്ധപ്പെട്ട് നേരത്തെ ബ്രിട്ടനും യൂറോപ്യൻ യൂണിയനും ഉപരോധം ഏർപ്പെടുത്തിയ കപ്പലാണിത്. എന്നാൽ ഇറാനിയൻ റവല്യൂഷണറി ഗാർഡ് കടലിടുക്ക് അടച്ചതായി പ്രഖ്യാപിച്ച ശനിയാഴ്ച മാത്രം 13 കപ്പലുകൾ യാത്ര അവസാനിപ്പിച്ച് തിരിച്ചുപോയി എന്നാണ് വിൻഡ്‌വാർഡ് മാരിടൈം ഇൻ്റലിജൻസ് റിപ്പോർട്ട് ചെയ്യുന്നത്. ശനിയാഴ്ച ഒരു കണ്ടെയ്‌നർ കപ്പലിന് നേരെ വെടിവെപ്പുണ്ടാവുകയും മറ്റ് രണ്ട് കപ്പലുകൾക്ക് നേരെ ആക്രമണ ഭീഷണി ഉയരുകയും ചെയ്തതോടെ ഞായറാഴ്ച ഒരൊറ്റ ടാങ്കർ പോലും ഈ പാതയിലൂടെ സഞ്ചരിച്ചിട്ടില്ല.സ്ഥിതിഗതികൾ അതീവ ഗുരുതരമായ സാഹചര്യത്തിൽ, വിഎച്ച്എഫ് റേഡിയോ വഴി ഭീഷണി സന്ദേശങ്ങൾ ലഭിച്ചാൽ ഉടൻ യാത്ര അവസാനിപ്പിച്ച് മടങ്ങണമെന്ന് കപ്പലുകൾക്ക് ഷിപ്പിംഗ് അഡ്വൈസറി ഗ്രൂപ്പായ ആംബ്രി നിർദ്ദേശം നൽകിയിട്ടുണ്ട്. പല വാണിജ്യ കപ്പലുകളെയും യാത്ര തുടരുന്നതിൽ നിന്ന് ഇറാൻ നാവികസേന നേരിട്ട് തടയുന്നതായും റിപ്പോർട്ടുകളുണ്ട്. ഗതാഗതം പൂർണ്ണമായും തടസ്സപ്പെട്ടതോടെ ആഗോള എണ്ണ വിതരണ ശൃംഖല കനത്ത പ്രതിസന്ധിയിലേക്കാണ് നീങ്ങുന്നത്. നയതന്ത്ര തലത്തിൽ അടിയന്തര ഇടപെടൽ ഉണ്ടായില്ലെങ്കിൽ വരും ദിവസങ്ങളിൽ സ്ഥിതി കൂടുതൽ വഷളാകുമെന്നാണ് വിലയിരുത്തപ്പെടുന്നത്.