ടെഹ്റാൻ: അമേരിക്കയും ഇറാനും തമ്മിലുള്ള മുൻകാല ചർച്ചകളിൽ സുപ്രധാനമായ പുരോഗതി കൈവരിച്ചിരുന്നുവെങ്കിലും, സോഷ്യൽ മീഡിയയിലൂടെ പ്രചരിക്കുന്ന പ്രകോപനപരമായ സന്ദേശങ്ങൾ നയതന്ത്ര നീക്കങ്ങളെ പ്രതികൂലമായി ബാധിക്കുന്നുവെന്ന് വിരമിച്ച പാകിസ്ഥാൻ ആർമി ജനറൽ സാഹിദ് മഹ്മൂദ്. ഇരുരാജ്യങ്ങളും തമ്മിലുള്ള വർദ്ധിച്ചുവരുന്ന അവിശ്വാസമാണ് സമാധാന ശ്രമങ്ങൾക്ക് മുന്നിലുള്ള പ്രധാന തടസമെന്നും അദ്ദേഹം അൽ ജസീറയോട് പ്രതികരിച്ചു. മുൻപ് നടന്ന ചർച്ചകൾ അഭിപ്രായവ്യത്യാസങ്ങൾ പരിഹരിക്കാൻ സഹായിച്ചിരുന്നുവെങ്കിലും, പുതിയ സംഘർഷങ്ങൾ ചർച്ചകളെ വീണ്ടും പ്രതിസന്ധിയിലാക്കിയിരിക്കുകയാണ്.അമേരിക്കയുമായും ഇറാനുമായും പാകിസ്ഥാൻ നിരന്തരം ആശയവിനിമയം നടത്തുന്നുണ്ടെന്നും മേഖലയിലെ മറ്റ് പ്രമുഖ രാജ്യങ്ങളായ സൗദി അറേബ്യ, ഖത്തർ, തുർക്കി, ഈജിപ്ത്, ചൈന എന്നിവരുമായി സഹകരിച്ചാണ് സമാധാന നീക്കങ്ങൾ നടത്തുന്നതെന്നും മഹ്മൂദ് വ്യക്തമാക്കി.
തകർന്നടിഞ്ഞ വിശ്വാസം വീണ്ടെടുക്കാനും കൂടുതൽ സൈനിക നീക്കങ്ങൾ ഒഴിവാക്കാനുമാണ് പാകിസ്ഥാൻ ഇപ്പോൾ മുൻഗണന നൽകുന്നത്. തർക്കങ്ങൾ പരിഹരിച്ച് ചർച്ചകൾ പുനരാരംഭിക്കാൻ കഴിയുമെന്ന ശുഭാപ്തിവിശ്വാസമാണ് അദ്ദേഹം പങ്കുവെച്ചത്.ഇരുവിഭാഗങ്ങളും തമ്മിലുള്ള ഈ അകലം ഉടൻ ഇല്ലാതാകുമെന്നും വൈകാതെ തന്നെ സംഭാഷണത്തിനുള്ള സാഹചര്യം ഒരുങ്ങുമെന്നും അദ്ദേഹം പ്രത്യാശ പ്രകടിപ്പിച്ചു.
പശ്ചിമേഷ്യയിലെ സംഘർഷം ആഗോളതലത്തിൽ വലിയ പ്രതിസന്ധികൾ സൃഷ്ടിക്കുന്ന സാഹചര്യത്തിൽ, പാകിസ്ഥാൻ്റെ നേതൃത്വത്തിൽ നടക്കുന്ന ഈ അന്താരാഷ്ട്ര മധ്യസ്ഥശ്രമങ്ങൾ അതീവ പ്രാധാന്യത്തോടെയാണ് ലോകം വീക്ഷിക്കുന്നത്. നയതന്ത്ര തലത്തിലുള്ള ഈ ഇടപെടലുകൾ വിജയിച്ചാൽ മാത്രമേ മേഖലയിൽ ശാശ്വതമായ സമാധാനം ഉറപ്പാക്കാൻ സാധിക്കൂ എന്നും അദ്ദേഹം ഓർമ്മിപ്പിച്ചു.
