ടെഹ്റാൻ: ഹോർമുസ് കടലിടുക്കിലെ ഉപരോധം ലംഘിക്കാൻ ശ്രമിച്ച ഇറാൻ പതാക ഘടിപ്പിച്ച രണ്ട് എണ്ണക്കപ്പലുകൾക്ക് നേരെ അമേരിക്കൻ സൈന്യം വെടിയുതിർത്തു. ഒമാൻ ഗൾഫിലെ ഇറാനിയൻ തുറമുഖത്തേക്ക് കടക്കാൻ ശ്രമിച്ച കപ്പലുകളെ ആക്രമിച്ച് പ്രവർത്തനരഹിതമാക്കിയതായി യുഎസ് സെൻട്രൽ കമാൻഡ് വെള്ളിയാഴ്ച അറിയിച്ചു. യുഎസ്എസ് ജോർജ്ജ് എച്ച്.ഡബ്ല്യു ബുഷ് എന്ന വിമാനവാഹിനിക്കപ്പലിൽ നിന്ന് പറന്നുയർന്ന എഫ്/എ-18 സൂപ്പർ ഹോർനെറ്റ് യുദ്ധവിമാനങ്ങളാണ് ആക്രമണം നടത്തിയത്.
എം/ടി സീ സ്റ്റാർ III, എം/ടി സെവ്ദ എന്നീ ടാങ്കറുകൾക്ക് നേരെയാണ് അമേരിക്കൻ യുദ്ധവിമാനങ്ങൾ കൃത്യതയാർന്ന മിസൈലുകൾ പ്രയോഗിച്ചത്. കപ്പലുകളുടെ പുകക്കുഴലുകൾ തകർത്തുകൊണ്ട് അവയെ മുന്നോട്ട് നീങ്ങാൻ കഴിയാത്ത വിധം നിശ്ചലമാക്കുകയായിരുന്നു. ബുധനാഴ്ചയും സമാനമായ രീതിയിൽ ‘എം/ടി ഹസ്ന’ എന്ന മറ്റൊരു ടാങ്കറിന് നേരെയും അമേരിക്കൻ സൈന്യം വെടിയുതിർത്തിരുന്നു. ഹോർമുസ് കടലിടുക്കിലെ തങ്ങളുടെ യുദ്ധക്കപ്പലുകൾക്ക് നേരെ ഇറാൻ നടത്തിയ ആക്രമണങ്ങൾക്കുള്ള മറുപടിയായാണ് ഈ നടപടിയെന്ന് സെൻട്രൽ കമാൻഡ് വ്യക്തമാക്കി.
മേഖലയിൽ ആക്രമണങ്ങൾ തുടരുന്നുണ്ടെങ്കിലും അമേരിക്കയും ഇറാനും തമ്മിലുള്ള വെടിനിർത്തൽ കരാർ ഇപ്പോഴും നിലനിൽക്കുന്നുണ്ടെന്നാണ് ഔദ്യോഗിക വൃത്തങ്ങൾ സൂചിപ്പിക്കുന്നത്. സൈനിക നീക്കങ്ങൾക്ക് ശേഷവും വെടിനിർത്തൽ നടപടികൾ തുടരുകയാണെന്ന് പ്രസിഡന്റ് ഡൊണാൾഡ് ട്രംപ് വ്യാഴാഴ്ച അറിയിച്ചിരുന്നു. എന്നാൽ, സമാധാന ചർച്ചകൾക്കിടയിലും ഇത്തരം സൈനിക ഏറ്റുമുട്ടലുകൾ വർദ്ധിക്കുന്നത് ഗൾഫ് മേഖലയിൽ വീണ്ടും യുദ്ധഭീതി പടർത്തിയിരിക്കുകയാണ്.
