ദോഹ: ഇറാന് അമേരിക്ക സംഘര്ഷം അവസാനിപ്പിക്കുന്നതിന്റെ ഭാഗമായി ഇറാന്റെ മരവിപ്പിച്ച ഫണ്ടുകളില് ഭാഗീകമായ ഫണ്ട് ലഭ്യമാക്കാന് നടപടി സ്വീകരിക്കും. ഖത്തറില് നടന്ന മധ്യസ്ഥ ചര്ച്ചയ പിന്നാലെ ഇറാനാണ് ഇക്കാര്യം വ്യക്തമാക്കിയത്. ദോഹയില് നടന്ന ചര്ച്ചയില് ഇറാന് സംഘത്തെ നയിച്ച വിദേശകാര്യ ഉപമന്ത്രി കാസിം ഗരീബാബാദി പുതിയ ഘട്ട ചര്ച്ചകള് അവസാനിച്ചതായി പ്രഖ്യാപിച്ചു. ഇറാന്റെ ഔദ്യോഗിക വാര്ത്താ ഏജന്സിയായ ഇര്ന റിപ്പോര്ട്ട് ചെയ്തതനുസരിച്ച്, ഇറാന്-യുഎസ് ധാരണാപത്രം നടപ്പിലാക്കുന്നതിനെക്കുറിച്ചായിരുന്നു ചര്ച്ചകള്.
കരാറിന്റെ ലംഘനങ്ങള് റിപ്പോര്ട്ട് ചെയ്യാനും ചര്ച്ച ചെയ്യാനുമായി ഒരു ആശയവിനിമയ ചാനല് സ്ഥാപിക്കുമെന്ന് അദ്ദേഹം പറഞ്ഞു. കൂടാതെ, ഇറാന്റെ മരവിപ്പിച്ച 6 ബില്യണ് ഡോളര് ഫണ്ടിന്റെ ഒരു ഭാഗം ലഭ്യമാക്കുമെന്നും അതുവഴി ടെഹ്റാന് രാജ്യത്തിന്റെ ആഭ്യന്തര ആവശ്യങ്ങള്ക്കനുസരിച്ച് സാധനങ്ങള് വാങ്ങാന് സാധിക്കുമെന്നും ഗരീബാബാദി വ്യക്തമാക്കി.അപ്പോഴും വിപുലമായ തര്ക്കങ്ങള് പരിഹരിച്ചതായി ടെഹ്റാനോ വാഷിംഗ്ടണോ പറഞ്ഞിട്ടില്ല, ഒപ്പം വലിയൊരു രാഷ്ട്രീയ മുന്നേറ്റമൊന്നും ഇരുപക്ഷവും പ്രഖ്യാപിച്ചിട്ടുമില്ല.
ചര്ച്ചകള് ധാരണാപത്രവുമായി ബന്ധപ്പെട്ട വിഷയങ്ങളില് ‘പോസിറ്റീവായ പുരോഗതി’ കാണിക്കുന്നുണ്ടെന്ന് ഖത്തര് വിദേശകാര്യ മന്ത്രാലയം വിശേഷിപ്പിച്ചു, കൂടാതെ സ്വിറ്റ്സര്ലന്ഡില് അടുത്തിടെ നടന്ന ഉച്ചകോടിയുടെ ഫലങ്ങളെ അടിസ്ഥാനമാക്കിയാണ് ഇവ മുന്നോട്ട് പോകുന്നതെന്നും അവര് കൂട്ടിച്ചേര്ത്തു. ജൂലൈ 9-ന് സംസ്കരിക്കാനിരിക്കുന്ന ഇറാന്റെ അന്തരിച്ച പരമോന്നത നേതാവ് ആയത്തുള്ള അലി ഖമേനിയുടെ സംസ്കാര ചടങ്ങുകള്ക്ക് ശേഷം അടുത്ത റൗണ്ട് ചര്ച്ചകള് നടക്കുമെന്നും മന്ത്രാലയം അറിയിച്ചു.
ഖത്തറില് അമേരിക്കയുമായി നടത്തിയ പരോക്ഷ ചര്ച്ചകള് രണ്ട് ദിവസത്തെ സാങ്കേതിക സംവാദങ്ങള്ക്ക് ശേഷം ബുധനാഴ്ച അവസാനിച്ചതായി ഇറാന് അറിയിച്ചു. തങ്ങളുടെ താല്ക്കാലിക കരാര് നടപ്പിലാക്കുന്നതില് ഇരുപക്ഷവും പുരോഗതി റിപ്പോര്ട്ട് ചെയ്തെങ്കിലും, ശാശ്വതമായ ഒരു സമാധാനത്തിലേക്ക് അവര് അടുത്തു എന്നതിന്റെ സൂചനകളൊന്നും നല്കിയിട്ടുമില്ല.
Steps initiated to release Iran’s frozen funds: Decision taken during mediation talks in Qatar.
