വാഷിംഗ്ടൺ: ദക്ഷിണ കൊറിയയുമായി ചേർന്ന് നടത്തുന്ന സംയുക്ത സൈനിക പരിശീലന പരിപാടികളുടെ വ്യാപ്തി വൻതോതിൽ വെട്ടിച്ചുരുക്കാൻ അമേരിക്കൻ പ്രതിരോധ ആസ്ഥാനമായ പെന്റഗണിന് ഉത്തരവിട്ട് പ്രസിഡന്റ് ഡോണൾഡ് ട്രംപ്. ഉത്തരകൊറിയൻ ഭരണാധികാരി കിം ജോങ് ഉന്നുമായുള്ള തന്റെ മികച്ച വ്യക്തിബന്ധം ചൂണ്ടിക്കാട്ടിയാണ് ട്രംപിന്റെ നയതന്ത്ര നീക്കം. ഇറാനെതിരായ പോരാട്ടത്തിൽ വാഷിങ്ടണ് പിന്തുണ നൽകാൻ ദക്ഷിണ കൊറിയ തയ്യാറാകാത്തതിലുള്ള കടുത്ത നിരാശയും ഈ തീരുമാനത്തിന് പിന്നിലുണ്ട്.
തിങ്കളാഴ്ച ആരംഭിക്കാനിരുന്ന കൂട്ടു സൈനിക അഭ്യാസങ്ങൾ വലിയ സാമ്പത്തികച്ചെലവ് വരുത്തിവെക്കുന്നതാണെന്ന് ട്രംപ് ഞായറാഴ്ച സോഷ്യൽ മീഡിയയിൽ കുറിച്ചു. താൻ വൈറ്റ് ഹൗസിലുള്ള കാലത്തോളം ഉത്തരകൊറിയ തികച്ചും മര്യാദയോടും ഭീഷണി ഉയർത്താതെയും മാത്രമാണ് പെരുമാറിയത്. അതിനാൽ ഇത്തരമൊരു സൈനിക അഭ്യാസം ആ രാജ്യത്തിന് തീർത്തും അനുചിതവും ശത്രുതാപരവുമായ സന്ദേശമാണ് നൽകുന്നതെന്നും ട്രംപ് വ്യക്തമാക്കി.
ഓഗസ്റ്റ് 17 മുതൽ 27 വരെ നടക്കേണ്ട വാർഷിക സൈനിക പരിശീലനത്തിന് മുന്നോടിയായാണ് ട്രൂത്ത് സോഷ്യലിലൂടെ ട്രംപിന്റെ പ്രതികരണം വന്നത്. ദക്ഷിണ കൊറിയയുമായി ചേർന്ന് സംയുക്ത സൈനിക അഭ്യാസങ്ങളിൽ പങ്കാളിയാകാൻ പണ്ട് അമേരിക്ക സമ്മതിച്ചതിൽ കിം ജോങ് ഉന്നുമായുള്ള നല്ല ബന്ധത്തിന്റെ പശ്ചാത്തലത്തിൽ തനിക്ക് അതൃപ്തിയുണ്ടെന്ന് ട്രംപ് കുറിച്ചു. അഭ്യാസം പൂർണ്ണമായി റദ്ദാക്കാൻ ഇനി സമയമില്ലാത്തതിനാൽ, ഇതിന്റെ വ്യാപ്തി ഗണ്യമായി കുറയ്ക്കാൻ പ്രതിരോധ സെക്രട്ടറി പീറ്റ് ഹെഗ്സെത്തിന് നിർദേശം നൽകിയിട്ടുണ്ടെന്നും അദ്ദേഹം വ്യക്തമാക്കി.
ഇറാനെതിരായ യുഎസ്-ഇസ്രായേൽ യുദ്ധത്തിൽ ദക്ഷിണ കൊറിയ സ്വീകരിച്ച നിലപാടിനെ ട്രംപ് രൂക്ഷമായി വിമർശിച്ചു. ഇറാനെ ആണവമുക്തമാക്കുന്ന പ്രക്രിയയിൽ പങ്കാളികളാകാൻ താൻ അടുത്തിടെ ദക്ഷിണ കൊറിയൻ പ്രസിഡന്റിനോട് ആവശ്യപ്പെട്ടിരുന്നുവെങ്കിലും അവർ അത് നിരസിക്കുകയായിരുന്നുവെന്ന് ട്രംപ് വെളിപ്പെടുത്തി.
വാഷിങ്ടൺ സൈനിക അഭ്യാസങ്ങൾ വെട്ടിച്ചുരുക്കുന്നത് എത്രത്തോളം പ്രാധാന്യമുള്ള തീരുമാനമാണെന്നതും, ഇത് യുഎസ്-ഉത്തരകൊറിയ ബന്ധം കൂടുതൽ മെച്ചപ്പെടുത്താൻ സഹായിക്കുമോ എന്നതുമാണ് അന്താരാഷ്ട്ര തലത്തിൽ ഇപ്പോൾ ഉയരുന്ന പ്രധാന ചോദ്യം.
