മിനിയാപോളിസ്: മിനിയാപോളിസിൽ നടന്ന കുടിയേറ്റവിരുദ്ധ പരിശോധനയ്ക്കിടെ വെനസ്വേലൻ സ്വദേശിയായ യുവാവിനെ വെടിവെച്ച് പരിക്കേൽപ്പിച്ച സംഭവത്തിൽ, താൻ ആക്രമിക്കപ്പെട്ടതാണെന്ന് എഫ്ബിഐയോട് വ്യാജ പ്രസ്താവന നൽകിയെന്ന ഫെഡറൽ കുറ്റാരോപണം നിഷേധിച്ച് യുഎസ് ഇമിഗ്രേഷൻ ആന്റ് കസ്റ്റംസ് എൻഫോഴ്സ്മെന്റ് ഉദ്യോഗസ്ഥൻ ക്രിസ്റ്റ്യൻ കാസ്ട്രോ. യുഎസ് മജിസ്ട്രേറ്റ് കോടതിയിൽ ഹാജരാക്കിയപ്പോഴാണ് താൻ കുറ്റക്കാരനല്ലെന്ന് 52-കാരനായ കാസ്ട്രോ വാദിച്ചത്.
ജനുവരി 14-നാണ് ജൂലിയോ സീസർ സോസ-സെലിസ് എന്ന 24-കാരനായ വെനസ്വേലൻ സ്വദേശിക്ക് കാസ്ട്രോയുടെ വെടിയേറ്റത്. വധശ്രമത്തിന് കൺട്രി കേസിൽ സംസ്ഥാന കോടതിയിൽ ഹാജരാക്കി ജാമ്യത്തിൽ വിട്ടയച്ചതിന് തൊട്ടടുത്ത ദിവസമാണ് ഫെഡറൽ കോടതി നടപടികൾ നടന്നത്. കാസ്ട്രോയെ ടെക്സാസിൽ നിന്ന് മിനസോട്ടയിലേക്ക് വിചാരണയ്ക്കായി കൊണ്ടുവരുന്നതിനെച്ചൊല്ലി മാസങ്ങളായി നിലനിന്നിരുന്ന നിയമ-രാഷ്ട്രീയ തർക്കങ്ങൾക്കൊടുവിലാണ് അദ്ദേഹം ഫെഡറൽ അധികൃതർക്ക് മുന്നിൽ കീഴടങ്ങിയത്.
വാതിലിനു പുറത്തുനിന്ന് നടത്തിയ വെടിവെപ്പിലാണ് സോസ-സെലിസിന് കാലിൽ പരിക്കേറ്റത്. സംഭവത്തിൽ അന്വേഷണം നടത്തിയ ഉദ്യോഗസ്ഥരോട്, വാതിലിൽ ഉപയോഗിക്കുന്ന ചൂലിന്റെ പിടിയും മൺവെട്ടിയും ഉപയോഗിച്ച് താൻ ആക്രമിക്കപ്പെട്ടപ്പോഴാണ് ആത്മരക്ഷാർത്ഥം വെടിവെച്ചതെന്ന് കാസ്ട്രോ അവകാശപ്പെട്ടിരുന്നു. എന്നാൽ ഇത് പച്ചക്കള്ളമാണെന്ന് പ്രോസിക്യൂട്ടർമാർ വീഡിയോ തെളിവുകളുടെ അടിസ്ഥാനത്തിൽ വ്യക്തമാക്കി.
ടെക്സാസിൽ വെച്ച് മെയ് മാസത്തിൽ പൊലീസ് ഇയാളെ അറസ്റ്റ് ചെയ്തിരുന്നെങ്കിലും വിട്ടുനൽകാൻ ടെക്സാസ് ഭരണകൂടം വിസമ്മതിക്കുകയായിരുന്നു. തുടർന്ന്, അവിടെ ജയിൽ മോചിതനായ ശേഷം ഫെഡറൽ കോടതി ഇയാളെ കുറ്റക്കാരനായി കണ്ടെത്തി സമൻസ് അയച്ചതോടെയാണ് ഇയാൾ സ്വന്തം നിലയിൽ മിനസോട്ടയിൽ തിരിച്ചെത്തിയത്. ‘ഓപ്പറേഷൻ മെട്രോ സർജ്’ എന്ന വിവാദപരമായ കുടിയേറ്റവിരുദ്ധ ദൗത്യത്തിനിടയിൽ ക്രമസമാധാന ലംഘനം നടത്തിയതിന് വിചാരണ നേരിടുന്ന ആദ്യത്തെ ഫെഡറൽ ഉദ്യോഗസ്ഥനാണ് ക്രിസ്റ്റ്യൻ കാസ്ട്രോ. നിലവിൽ 75,000 ഡോളറിന്റെ ബോണ്ടിലും ജി.പി.എസ് ആങ്കിൾ മോണിറ്റർ ധരിക്കണമെന്ന ഉപാധിയിലുമാണ് ഇയാൾക്ക് ജാമ്യം അനുവദിച്ചിരിക്കുന്നത്.
