വാഷിംഗ്ടണ്: രാജ്യാന്തര തലത്തിൽ വർദ്ധിച്ചുവരുന്ന ഭൗമരാഷ്ട്രീയ സംഘർഷങ്ങളെ തുടർന്ന് വ്യാഴാഴ്ചയും പെട്രോൾ, ഡീസൽ വില കുതിച്ചുയർന്നു. വരും ദിവസങ്ങളിലും ഇന്ധനവില വർദ്ധിക്കാൻ തന്നെയാണ് സാധ്യതയെന്ന് ഊർജ്ജ മേഖലയിലെ വിദഗ്ദ്ധർ മുന്നറിയിപ്പ് നൽകുന്നു. ഉപഭോക്താക്കൾ ഉയർന്ന വില ദീർഘകാലത്തേക്ക് നേരിടാൻ തയ്യാറാകണമെന്ന് ഇന്ധനവില നിരീക്ഷിക്കുന്ന ഗ്യാസ്ബഡിയിലെ വിദഗ്ദ്ധൻ പാട്രിക് ഡി ഹാൻ വ്യക്തമാക്കി.
അമേരിക്കയിൽ പെട്രോളിന്റെ ദേശീയ ശരാശരി ഒറ്റരാത്രികൊണ്ട് 7 സെന്റ് വർദ്ധിച്ച് ഗാലന് 4.44 ഡോളറിലെത്തി. ഫെബ്രുവരിയിൽ ഇറാൻ യുദ്ധം ആരംഭിച്ചതിനുശേഷം വിലയിൽ ഏകദേശം 50 ശതമാനത്തിന്റെ വർദ്ധനവാണ് രേഖപ്പെടുത്തിയത്. ചരക്കുസേവന ഗതാഗതത്തിന് ഒഴിച്ചുകൂടാനാവാത്ത ഡീസൽ വില ഗാലന് 6.40 ഡോളർ എന്ന സർവ്വകാല റെക്കോർഡിലെത്തി. സെപ്റ്റംബർ തുടക്കം മുതൽ മാത്രം ഡീസൽ വിലയിൽ 77 സെന്റിന്റെ വർദ്ധനവുണ്ടായി.
യു.എസ് – ഇറാൻ, റഷ്യ – യുക്രെയ്ൻ യുദ്ധങ്ങൾ ആഗോള ക്രൂഡോയിൽ വിതരണത്തെ സാരമായി ബാധിച്ചതാണ് വിലക്കയറ്റത്തിന് പ്രധാന കാരണം. ഇതോടെ ഡീസൽ വില വർദ്ധനവ് രാജ്യത്ത് കടുത്ത പണപ്പെരുപ്പത്തിന് വഴിവെക്കുമെന്ന് ഗൾഫ് ഓയിലിന്റെ ചീഫ് എനർജി അഡ്വൈസർ ടോം ക്ലോസ മുന്നറിയിപ്പ് നൽകുന്നു. രാജ്യത്തുടനീളം അവശ്യവസ്തുക്കളും കാർഷിക ഉൽപ്പന്നങ്ങളും എത്തിക്കുന്ന ട്രക്കുകളും റെയിലുകളും ഡീസലിനെയാണ് പ്രധാനമായും ആശ്രയിക്കുന്നത്. ചരക്കുകൂലി വർദ്ധിക്കുന്നത് എല്ലാ സാധനങ്ങളുടെയും വില കൂട്ടും.
ഇതിനുപുറമെ, വരാനിരിക്കുന്ന തണുപ്പുകാലത്ത് വീടുകൾ ചൂടാക്കാൻ ഹീറ്റിംഗ് ഓയിൽ (ഡീസൽ അധിഷ്ഠിത ഇന്ധനം) ഉപയോഗിക്കുന്ന ദശലക്ഷക്കണക്കിന് കുടുംബങ്ങളുടെ കറന്റ്, വൈദ്യുതി ബില്ലുകളിലും വൻ വർദ്ധനവുണ്ടാകും. ഒരു കുടുംബത്തിന് ശൈത്യകാലത്ത് ശരാശരി 6,000 ഡോളറോളം ഇതിനായി മാത്രം ചെലവഴിക്കേണ്ടി വരുമെന്നാണ് വിലയിരുത്തപ്പെടുന്നത്. പെട്രോൾ വില ചെറിയ തോതിൽ ഉയർന്നേക്കാമെങ്കിലും ഡീസൽ വിലയിലുണ്ടാകുന്ന കുതിച്ചുചാട്ടം വരുംദിവസങ്ങളിൽ ജനജീവിതം കൂടുതൽ ദുസ്സഹമാക്കും.
