ലണ്ടൻ: എയർ ട്രാഫിക് കൺട്രോൾ സംവിധാനത്തിലുണ്ടായ ഗുരുതരമായ സാങ്കേതിക തകരാറിനെ തുടർന്ന് യുകെയിലെ പ്രധാന വിമാനത്താവളങ്ങളുടെ പ്രവർത്തനം താറുമാറായി. പ്രമുഖ ഗതാഗത കേന്ദ്രങ്ങളിലായി ഏകദേശം രണ്ടായിരത്തോളം വിമാന സർവീസുകൾ റദ്ദാക്കേണ്ടി വന്നതോടെ ആയിരക്കണക്കിന് യാത്രക്കാരാണ് വിവിധ വിമാനത്താവളങ്ങളിൽ കുടുങ്ങിക്കിടക്കുന്നത്. തകരാർ പരിഹരിച്ച് സർവീസുകൾ സാധാരണ നിലയിലാക്കാനുള്ള തീവ്രശ്രമത്തിലാണ് അധികൃതർ.
ലണ്ടനിലെ പ്രമുഖ വിമാനത്താവളങ്ങളായ ഹിത്രൂ, ഗാറ്റ്വിക്ക്, സ്റ്റാൻസ്റ്റെഡ് എന്നിവിടങ്ങളിൽ നിന്നുള്ള നൂറുകണക്കിന് സർവീസുകൾ വിവിധ പ്രാദേശിക എയർലൈനുകൾ പൂർണ്ണമായും റദ്ദാക്കി. നിലവിൽ ചില സർവീസുകൾ പുനരാരംഭിച്ചിട്ടുണ്ടെങ്കിലും യാത്രാതടസ്സങ്ങളും വൈകലുകളും ഇപ്പോഴും തുടരുകയാണ്. രാജ്യത്തെ വ്യോമഗതാഗത നിയന്ത്രണ ഏജൻസിയായ നാഷണൽ എയർ ട്രാഫിക് സർവീസസിന്റെ വീഴ്ചയ്ക്കെതിരെ കടുത്ത വിമർശനമാണ് ഉയരുന്നത്.
സംഭവത്തിന്റെ ഗൗരവം കണക്കിലെടുത്ത് യുകെ ഗതാഗത സെക്രട്ടറി ഹൈഡി അലക്സാണ്ടർ, നാറ്റ്സ് ചീഫ് എക്സിക്യൂട്ടീവ് മാർട്ടിൻ റോൾഫുമായി അടിയന്തര കൂടിക്കാഴ്ച നടത്തി. ഉണ്ടായ വലിയ യാത്രാതടസ്സത്തിൽ കടുത്ത ആശങ്ക രേഖപ്പെടുത്തിയ ഗതാഗത മന്ത്രാലയം, വീഴ്ചയെക്കുറിച്ച് സമഗ്രമായ അന്വേഷണത്തിന് ഉത്തരവിട്ടിട്ടുണ്ട്. ലണ്ടൻ വിമാനത്താവളങ്ങൾക്ക് പുറമെ മാഞ്ചസ്റ്ററിലും സർവീസുകൾ തടസപ്പെട്ടു. ഏവിയേഷൻ അനലിറ്റിക്സ് സ്ഥാപനമായ സിറിയത്തിന്റെ കണക്കനുസരിച്ച് കഴിഞ്ഞ ദിവസങ്ങളിൽ മാത്രം ആയിരത്തി എണ്ണൂറിലധികം സർവീസുകളാണ് യുകെയിൽ റദ്ദാക്കപ്പെട്ടത്.
വിമാനങ്ങളും ജീവനക്കാരെയും കൃത്യസ്ഥലങ്ങളിൽ എത്തിക്കുന്നതിലെ കാലതാമസം കാരണം വരും ദിവസങ്ങളിലും തടസ്സങ്ങൾ തുടർന്നേക്കുമെന്ന് ഹിത്രൂ, ഗാറ്റ്വിക്ക് അധികൃതർ മുന്നറിയിപ്പ് നൽകി. യാത്രയ്ക്ക് ഇറങ്ങുന്നതിന് മുൻപ് സർവീസുകളുടെ നിലവിലെ അവസ്ഥ പരിശോധിച്ച് ഉറപ്പുവരുത്താൻ എയർലൈനുകൾ യാത്രക്കാരോട് നിർദ്ദേശിച്ചിട്ടുണ്ട്. ലോകത്തിലെ ഏറ്റവും തിരക്കേറിയ വിമാനത്താവളങ്ങളിലൊന്നായ ഹിത്രൂവിൽ ഇതിനുമുമ്പും സാങ്കേതിക തകരാറുകൾ മൂലം സമാനമായ രീതിയിൽ വിമാന സർവീസുകൾ തടസ്സപ്പെട്ടിട്ടുണ്ട്. വിമാന സർവീസുകൾ പൂർണ്ണമായി പുനഃസ്ഥാപിക്കുന്നതിലുണ്ടായ കാലതാമസത്തിനെതിരെ പ്രമുഖ ബജറ്റ് എയർലൈനുകൾ കടുത്ത പ്രതിഷേധവുമായി രംഗത്തെത്തി.
