വാഷിങ്ടണ്‍: സൗദി അറേബ്യയിലേക്കും രാജ്യത്തിന് മുകളിലൂടെയും സര്‍വീസ് നടത്തുന്ന യുഎസ് വിമാനക്കമ്പനികള്‍ക്ക് ജാഗ്രതാ നിര്‍ദേശം നല്‍കി അമേരിക്കന്‍ ഫെഡറല്‍ ഏവിയേഷന്‍ അഡ്മിനിസ്‌ട്രേഷന്‍ (എഫ്എഎ). മേഖലയില്‍ തുടരുന്ന സൈനിക പ്രവര്‍ത്തനങ്ങളും ഉപഗ്രഹ നാവിഗേഷന്‍ സംവിധാനങ്ങളിലുണ്ടാകുന്ന തടസങ്ങളും വിമാനങ്ങളുടെ സുരക്ഷയെ ബാധിക്കാനുള്ള സാധ്യത കണക്കിലെടുത്താണ് മുന്നറിയിപ്പ്. വ്യോമഗതാഗത സുരക്ഷയ്ക്ക് ഭീഷണിയാകാവുന്ന സാഹചര്യങ്ങള്‍ നിലനില്‍ക്കുന്നതിനാല്‍ വിമാനക്കമ്പനികള്‍ കൂടുതല്‍ ജാഗ്രത പാലിക്കണമെന്ന് എഫ്എഎ വ്യക്തമാക്കി.
വിമാനങ്ങള്‍ ഏത് ഉയരത്തില്‍ പറന്നാലും സുരക്ഷാ ഭീഷണി നേരിടാന്‍ സാധ്യതയുണ്ടെന്ന് എഫ്എഎയുടെ മുന്നറിയിപ്പില്‍ പറയുന്നു. സൗദി അറേബ്യയ്ക്ക് മുകളിലൂടെയുള്ള യാത്രയ്ക്കിടെ മാത്രമല്ല, വിമാനങ്ങള്‍ ലാന്‍ഡ് ചെയ്യുന്നതിനും ടേക്ക് ഓഫ് ചെയ്യുന്നതിനുമുള്ള ഘട്ടങ്ങളിലും അപകടസാധ്യതയുണ്ടാകാമെന്നാണ് വിലയിരുത്തല്‍. വിമാനങ്ങളുടെ ഗതിനിര്‍ണയത്തിന് സഹായിക്കുന്ന ഗ്ലോബല്‍ നാവിഗേഷന്‍ സാറ്റലൈറ്റ് സിസ്റ്റത്തില്‍ ഉണ്ടാകുന്ന തടസങ്ങള്‍ യാത്രാ സുരക്ഷയെ ബാധിച്ചേക്കാമെന്നും അധികൃതര്‍ ചൂണ്ടിക്കാട്ടി.
എഫ്എഎയുടെ അറിയിപ്പ് നിലവില്‍ വന്നതു മുതല്‍ ഡിസംബര്‍ 10 വരെ ഇത്് പ്രാബല്യത്തിലുണ്ടാകും. ഈ കാലയളവില്‍ സൗദി വ്യോമാതിര്‍ത്തി ഉപയോഗിക്കുന്ന വിമാനക്കമ്പനികള്‍ സുരക്ഷാ സാഹചര്യം വിലയിരുത്തി ആവശ്യമായ മുന്‍കരുതലുകള്‍ സ്വീകരിക്കേണ്ടിവരും. മേഖലയിലെ സൈനിക നീക്കങ്ങളും നാവിഗേഷന്‍ സംവിധാനങ്ങളിലെ തടസ്സങ്ങളും വിമാന സര്‍വീസുകള്‍ക്ക് സൃഷ്ടിച്ചേക്കാവുന്ന വെല്ലുവിളികളാണ് മുന്നറിയിപ്പിന് പിന്നിലെ പ്രധാന ആശങ്ക.
അമേരിക്കന്‍ ചരക്കുവിമാന കമ്പനിയായ ഫെഡ്എക്‌സ് സൗദി തലസ്ഥാനമായ റിയാദിലേക്ക് സര്‍വീസ് നടത്തുന്നുണ്ട്. എന്നാല്‍ നിലവില്‍ യുഎസിലെ വാണിജ്യ യാത്രാവിമാനക്കമ്പനികളൊന്നും റിയാദിലേക്ക് നേരിട്ട് സര്‍വീസ് നടത്തുന്നില്ലെന്നാണ് റിപ്പോര്‍ട്ട്. അതേസമയം, ഡെല്‍റ്റ എയര്‍ലൈന്‍സ് ഒക്ടോബര്‍ 23ന് അറ്റ്‌ലാന്റയില്‍നിന്ന് റിയാദിലേക്ക് പുതിയ സര്‍വീസ് ആരംഭിക്കാന്‍ പദ്ധതിയിട്ടിരുന്നു. മേഖലയിലെ സുരക്ഷാ സാഹചര്യം ഈ പദ്ധതിയെ ബാധിക്കുമോയെന്നത് ഇപ്പോള്‍ ശ്രദ്ധേയമാണ്.
ഡെല്‍റ്റയുടെ ചീഫ് എക്‌സിക്യൂട്ടീവ് ഓഫീസര്‍ എഡ് ബാസ്റ്റ്യന്‍, സര്‍വീസ് ആരംഭിക്കണോയെന്ന കാര്യത്തില്‍ സുരക്ഷയ്ക്കായിരിക്കും അന്തിമ പരിഗണനയെന്ന് സിഎന്‍ബിസിയോട് വ്യക്തമാക്കി. എഫ്എഎയുടെ മുന്നറിയിപ്പിന്റെ പശ്ചാത്തലത്തില്‍ പുതിയ സര്‍വീസിന്റെ കാര്യത്തില്‍ കമ്പനി സുരക്ഷാ വിലയിരുത്തലുകള്‍ക്ക് മുന്‍ഗണന നല്‍കുമെന്നാണ് സൂചന.
Exercise caution when flying over Saudi Arabia: FAA warns US airlines.
