വാഷിംഗ്ടണ്‍: യുഎസിലെ ഇടക്കാല തെരഞ്ഞെടുപ്പിന് ദിവസങ്ങള്‍ മാത്രം ശേഷിക്കെ അയോവയിലും കന്‍സസിലും നടത്താനിരുന്ന പ്രചാരണ റാലികള്‍ പ്രസിഡന്റ് ഡൊണാള്‍ഡ് ട്രംപ് റദ്ദാക്കി. ശനിയാഴ്ച കന്‍സസിലും ഞായറാഴ്ച അയോവയിലും നടത്താനിരുന്ന റാലികളാണ് റദ്ദാക്കിയത്. പകരം വിവിധ സംസ്ഥാനങ്ങളിലെ റിപ്പബ്ലിക്കന്‍ സ്ഥാനാര്‍ഥികള്‍ക്കായി ടെലിഫോണ്‍ വഴി പ്രചാരണ പരിപാടികളില്‍ ട്രംപ് പങ്കെടുക്കുമെന്നാണ് റിപ്പബ്ലിക്കന്‍ നാഷണല്‍ കമ്മിറ്റി അറിയിച്ചത്.
കന്‍സസിലെ റിപ്പബ്ലിക്കന്‍ സെനറ്റര്‍ റോജര്‍ മാര്‍ഷല്‍ മികച്ച നിലയിലാണെന്നും അതിനാല്‍ നേരിട്ടുള്ള റാലിക്ക് പകരം ഫോണിലൂടെ അദ്ദേഹത്തിന് വേണ്ടി പ്രചാരണം നടത്തുമെന്നും ട്രംപ് വ്യക്തമാക്കി. ട്രംപിന്റെ രാഷ്ട്രീയ സംഘടനയായ മാഗാഐഎന്‍സി 15ലധികം സംസ്ഥാനങ്ങളിലെ സ്ഥാനാര്‍ഥികള്‍ക്കായി ടെലി-റാലികള്‍ സംഘടിപ്പിക്കുമെന്നും അറിയിച്ചു. നവംബര്‍ മൂന്നിന് നടക്കുന്ന ഇടക്കാല തെരഞ്ഞെടുപ്പില്‍ കോണ്‍ഗ്രസിലെ അധികാര ശക്തി നിര്‍ണയിക്കുന്ന നിര്‍ണായക മത്സരങ്ങളാണ് നടക്കുന്നത്.
അതിനിടെ, അലാസ്‌കയിലെ ഡെമോക്രാറ്റിക് സെനറ്റ് സ്ഥാനാര്‍ഥി മേരി പെല്‍റ്റോളയെ ബന്ധപ്പെടുത്തിയുള്ള പ്രചാരണ വിവാദവും രാഷ്ട്രീയ ചര്‍ച്ചകള്‍ക്ക് വഴിവെച്ചിരിക്കുകയാണ്. റിപ്പബ്ലിക്കന്‍ സെനറ്റര്‍ ഡാന്‍ സള്ളിവന്റെ പേരിനോട് സാമ്യമുള്ള പേരുള്ള മറ്റൊരു സ്ഥാനാര്‍ഥിയെ മത്സരിപ്പിച്ച് റിപ്പബ്ലിക്കന്‍ വോട്ടുകള്‍ ഭിന്നിപ്പിക്കാന്‍ പെല്‍റ്റോളയുടെ പ്രചാരണ സംഘത്തിലെ ചിലര്‍ ശ്രമിച്ചെന്നായിരുന്നു ന്യൂയോര്‍ക്ക് ടൈംസിന്റെ റിപ്പോര്‍ട്ട്. 12 പേരുടെ മൊഴികള്‍, സന്ദേശങ്ങള്‍, രേഖകള്‍ എന്നിവയുടെ അടിസ്ഥാനത്തിലാണ് റിപ്പോര്‍ട്ടെന്ന് പത്രം അവകാശപ്പെട്ടു.
എന്നാല്‍ റിപ്പോര്‍ട്ടിനെ പെല്‍റ്റോള തള്ളിക്കളഞ്ഞു. തെരഞ്ഞെടുപ്പുമായി ബന്ധപ്പെട്ട യഥാര്‍ഥ വിഷയങ്ങളില്‍ നിന്ന് ശ്രദ്ധ തിരിക്കാനുള്ള മറ്റൊരു ശ്രമമാണിതെന്നും ഓരോ ദിവസവും പുതിയ വിവാദങ്ങള്‍ ഉയര്‍ത്തി ജനശ്രദ്ധ തിരിച്ചുവിടുകയാണെന്നും അവര്‍ പ്രതികരിച്ചു. അലാസ്‌കയിലെ ജനങ്ങളുടെ ജീവിതച്ചെലവും സാമ്പത്തിക പ്രശ്‌നങ്ങളും ചര്‍ച്ച ചെയ്യുന്നതില്‍ ന്യൂയോര്‍ക്ക് ടൈംസിന് താല്‍പര്യമില്ലെന്നും പെല്‍റ്റോള ആരോപിച്ചു. സള്ളിവന്റെ പ്രചാരണവുമായി തങ്ങള്‍ക്ക് യാതൊരു ബന്ധവുമില്ലെന്ന് പെല്‍റ്റോളയുടെ പ്രചാരണ വിഭാഗവും വ്യക്തമാക്കി.
അമേരിക്കന്‍ പ്രസിഡന്റ് ട്രംപിന്റെ ഭരണത്തിന്റെ ശേഷിക്കുന്ന കാലയളവിലെ നയങ്ങളും നിയമനിര്‍മാണങ്ങളും എത്രത്തോളം മുന്നോട്ടുകൊണ്ടുപോകാനാകുമെന്നതില്‍ ഈ ഇടക്കാല തെരഞ്ഞെടുപ്പ് നിര്‍ണായകമാണ്. ജനപ്രതിനിധിസഭയിലെയും സെനറ്റിലെയും നിയന്ത്രണം ഏത് പാര്‍ട്ടിക്ക് ലഭിക്കുമെന്നതും വിവിധ സംസ്ഥാനങ്ങളിലെ ഗവര്‍ണര്‍ സ്ഥാനങ്ങളിലേക്കുള്ള മത്സരങ്ങളും തെരഞ്ഞെടുപ്പിന്റെ പ്രാധാന്യം വര്‍ധിപ്പിക്കുന്നു. അവസാനഘട്ട പ്രചാരണം ശക്തമാകുന്നതിനിടെ റാലികള്‍ റദ്ദാക്കിയ സംഭവവും അലാസ്‌കയിലെ വിവാദവും ദേശീയ രാഷ്ട്രീയത്തില്‍ ശ്രദ്ധാകേന്ദ്രമായിരിക്കുകയാണ്.
Midterm Elections: Trump cancels campaign rallies in Iowa and Kansas
