ഷിബു കിഴക്കേകുറ്റ്
”കര്‍ത്താവ് നമുക്കുവേണ്ടി വലിയ കാര്യങ്ങള്‍ ചെയ്തിരിക്കുന്നു; നാം സന്തോഷത്താല്‍ നിറഞ്ഞിരിക്കുന്നു.” (സങ്കീര്‍ത്തനങ്ങള്‍ 126:3)
ടൊറന്റോ: മനുഷ്യന് ചിന്തിക്കാം, പക്ഷേ ദൈവമാണ് നല്‍കുന്നത്. നീണ്ട പന്ത്രണ്ട് വര്‍ഷത്തെ പ്രാര്‍ത്ഥനകള്‍ക്കും കാത്തിരിപ്പിനും പരിശ്രമങ്ങള്‍ക്കും ശേഷം ടൊറന്റോ സെന്റ് മേരീസ് ക്‌നാനായ കത്തോലിക്കാ ഇടവകയുടെ ചിരകാല സ്വപ്നം ദൈവിക കരുതലില്‍ യാഥാര്‍ത്ഥ്യമായി. സ്വന്തമായൊരു ദേവാലയം ഇടവകയ്ക്ക് ലഭിച്ചു. കാനഡയിലെ ക്‌നാനായ കത്തോലിക്കാ സഭാപ്രവര്‍ത്തനങ്ങള്‍ക്ക് തുടക്കം കുറിച്ച ഈ ഇടവകയുടെ ചരിത്രത്തില്‍ ഇതോടെ പുതിയൊരു അധ്യായം ആരംഭിക്കുന്നു.
ഒന്റാരിയോയിലെ സെന്റര്‍ വെല്ലിംഗ്ടണില്‍ മൂന്ന് ഏക്കര്‍ സ്ഥലത്തോടുകൂടിയ മനോഹരമായ ദേവാലയമാണ് ഇടവക സ്വന്തമാക്കിയത്. സ്വന്തമായൊരു ആരാധനാലയത്തിനായി വര്‍ഷങ്ങളായി ആഗ്രഹിക്കുകയും പ്രാര്‍ത്ഥിക്കുകയും ചെയ്ത വിശ്വാസികള്‍ക്ക് ഈ നേട്ടം വിശ്വാസത്തിന്റെയും ഐക്യത്തിന്റെയും കൂട്ടായ പരിശ്രമത്തിന്റെയും സാക്ഷ്യമാണ്.
വിതയ്ക്കാനും കൊയ്യാനും ഓരോ കാലമുണ്ടെന്ന തിരുവചനത്തെ ഓര്‍മ്മിപ്പിക്കുന്നതാണ് ഇടവകയുടെ ഈ ആത്മീയ യാത്ര. കഴിഞ്ഞ വര്‍ഷങ്ങളില്‍ പലരും പ്രതീക്ഷയോടെ വിതയ്ക്കുകയും പ്രാര്‍ത്ഥനയോടെ പരിപാലിക്കുകയും ചെയ്തത് ഇന്ന് ഫലം കണ്ടിരിക്കുന്നു.
2014-ല്‍ മിഷനായി തുടക്കം; പതിമൂന്നാം വര്‍ഷം കൂദാശ
2014-ല്‍ ക്‌നാനായ കത്തോലിക്കാ മിഷനായി ആരംഭിച്ചതാണ് സെന്റ് മേരീസ് സമൂഹം. പിന്നീട് അത് കാനഡയിലെ ക്‌നാനായ കത്തോലിക്കരുടെ ആദ്യ ഇടവകയായി ഉയര്‍ന്നു. ഈ വളര്‍ച്ചയ്ക്ക് പിന്നില്‍ നിരവധി വൈദികരുടെയും വിശ്വാസികളുടെയും നിസ്വാര്‍ത്ഥ സേവനമുണ്ട്.
ഈ അവസരത്തില്‍ പ്രത്യേകം അനുസ്മരിക്കേണ്ട വ്യക്തിയാണ് റവ. ഫാ. പത്രോസ് ചമ്പക്കര. ഇടവകയുടെ മുന്‍ വികാരിയായും വികാരി ജനറാളായും അദ്ദേഹം സേവനമനുഷ്ഠിച്ചു. ടൊറന്റോയിലെ ക്‌നാനായ കത്തോലിക്കാ സമൂഹത്തിന്റെ ആത്മീയ വളര്‍ച്ചയ്ക്കായി അദ്ദേഹം നടത്തിയ പരിശ്രമങ്ങള്‍ ഏറെ വിലപ്പെട്ടവയാണ്. സ്വന്തം ദേവാലയമെന്ന സ്വപ്നത്തിനുവേണ്ടിയും അദ്ദേഹം അധ്വാനിച്ചു. ആ ആഗ്രഹം വിശ്വാസികളുടെ മനസ്സില്‍ സജീവമായി നിലനിര്‍ത്താനും അതിനായുള്ള പ്രവര്‍ത്തനങ്ങള്‍ക്ക് ദിശാബോധം നല്‍കാനും അദ്ദേഹത്തിന്റെ നേതൃത്വത്തിന് കഴിഞ്ഞു. അന്ന് അദ്ദേഹം പാകിയ അടിത്തറ ഇന്ന് നന്ദിയോടെ സ്മരിക്കപ്പെടുന്നു.
കഴിഞ്ഞകാലങ്ങളില്‍ ഇടവകയുടെ ഉത്തരവാദിത്വം വഹിച്ച വിവിധ കമ്മിറ്റികളുടെയും ഭാരവാഹികളുടെയും പരിശ്രമങ്ങളും വിസ്മരിക്കാനാവില്ല. ലഭ്യമായ സാഹചര്യങ്ങളിലും പരിമിതികളിലും നിന്നുകൊണ്ട് അവര്‍ ആത്മാര്‍ത്ഥമായി പ്രവര്‍ത്തിച്ചു. ദേവാലയം സ്വന്തമാക്കാനുള്ള സാധ്യതകള്‍ അന്വേഷിക്കുകയും പദ്ധതികള്‍ മുന്നോട്ടുകൊണ്ടുപോകാന്‍ ശ്രമിക്കുകയും ചെയ്തു. ഓരോ കാലഘട്ടത്തിലും പ്രവര്‍ത്തിച്ചവരുടെ അധ്വാനവും സമര്‍പ്പണവും ഇന്നത്തെ നേട്ടത്തിന് പിന്നിലുണ്ട്.
നിര്‍ണായകമായത് ഇപ്പോഴത്തെ നേതൃത്വം
ഈ ദീര്‍ഘകാല സ്വപ്നം യാഥാര്‍ത്ഥ്യമാക്കുന്നതില്‍ നിര്‍ണായകമായത് രണ്ടു കാര്യങ്ങളാണ്. ഒന്ന്, നിലവിലെ ഇടവക വികാരി റവ. ഫാ. മാത്യു മേലേടത്തിന്റെ ആത്മാര്‍ത്ഥമായ പരിശ്രമങ്ങള്‍. രണ്ട്, ബില്‍ഡിംഗ് കമ്മിറ്റിയോടൊപ്പം ചേര്‍ന്നുള്ള അദ്ദേഹത്തിന്റെ പ്രവര്‍ത്തനങ്ങള്‍. വികാരിയായി ചുമതലയേറ്റ കാലഘട്ടത്തില്‍ തന്നെ സ്വന്തമായൊരു ദേവാലയം ലഭിക്കാനുള്ള അനുഗ്രഹീത അവസരം അദ്ദേഹത്തിനുണ്ടായി. ആ അവസരം കമ്മിറ്റി അംഗങ്ങളോടൊപ്പം കൈകോര്‍ത്ത് അദ്ദേഹം ഫലപ്രദമായി വിനിയോഗിച്ചു. വൈദികന്റെ ആത്മീയ നേതൃത്വവും കമ്മിറ്റിയുടെ കഠിനാധ്വാനവും വിശ്വാസികളുടെ സഹകരണവും ഒരുമിച്ചപ്പോള്‍ കാത്തിരുന്ന ദേവാലയം യാഥാര്‍ത്ഥ്യമായി.
ഈ നേട്ടത്തിന് കരുത്തുപകര്‍ന്നത് പലരുടെ പ്രവര്‍ത്തനങ്ങളാണ്. ബില്‍ഡിംഗ് കമ്മിറ്റി ചെയര്‍മാന്‍ ശ്രീ. തോമസ് ആയിരവേലില്‍ പ്രവര്‍ത്തനങ്ങള്‍ക്ക് നേതൃത്വം നല്‍കി. കൈക്കാരന്മാരായ ശ്രീ. ജോണ്‍ അരയത്തും ശ്രീ. അനീഷ് തെക്കേടത്തും അശ്രാന്തമായി പരിശ്രമിച്ചു. കമ്മിറ്റി അംഗങ്ങളായ ശ്രീ. ജോബി വലിയപുത്തന്‍പുരയില്‍, ശ്രീ. സാം കാരിക്കൊമ്പില്‍, ശ്രീ. ദീപു മലയില്‍ എന്നിവരും സജീവമായി മുന്നില്‍നിന്നു.
ദേവാലയം സ്വന്തമാക്കുന്ന വേളയില്‍ റവ. ഫാ. ജോസഫ് തച്ചറ സന്നിഹിതനായിരുന്നു. ഇത് ഈ ചരിത്രനിമിഷത്തിന്റെ സന്തോഷം ഇരട്ടിപ്പിച്ചു.
ഡയറക്ടറേറ്റ് ഓഫ് ക്‌നാനായ കാത്തലിക്‌സ് ഇന്‍ കാനഡയുടെ ചെയര്‍മാന്‍ ശ്രീ. റോയ് പുത്തന്‍കളവും സെക്രട്ടറി ശ്രീ. ജോഷി പാലത്തടത്തിലും നല്‍കിയ സഹകരണം പ്രധാന പങ്കുവഹിച്ചു. നോര്‍ത്ത് അമേരിക്കയിലെ വിവിധ ക്‌നാനായ കത്തോലിക്കാ ഇടവകാംഗങ്ങളുടെയും അഭ്യുദയകാംക്ഷികളുടെയും പ്രാര്‍ത്ഥനാപിന്തുണയും സാമ്പത്തിക സഹായവും ഇതുപോലെ നിര്‍ണായകമായി. ഡയറക്ടറേറ്റിന് കീഴില്‍ സ്വന്തമായി ദേവാലയം ലഭിക്കുന്ന രണ്ടാമത്തെ ഇടവക എന്ന പ്രത്യേകതയും ടൊറന്റോ സെന്റ് മേരീസിനുണ്ട്.
മുന്നോട്ടുള്ള വഴി
സന്തോഷത്തിനിടയിലും ഒരു യാഥാര്‍ത്ഥ്യം അവശേഷിക്കുന്നു. പുതിയ ദേവാലയത്തിലേക്കുള്ള യാത്രാദൂരം ചില കുടുംബങ്ങള്‍ക്ക് പ്രായോഗിക ബുദ്ധിമുട്ടുകള്‍ സൃഷ്ടിക്കുന്നുണ്ട്. എന്നാല്‍ സ്വന്തമായൊരു ആരാധനാലയം എന്ന വലിയ തുടക്കത്തിനാണ് ഇപ്പോള്‍ വഴിതെളിഞ്ഞിരിക്കുന്നത്. ഭാവിയില്‍ കൂടുതല്‍ സൗകര്യപ്രദമായ സ്ഥലം ലഭ്യമായാല്‍ ബന്ധപ്പെട്ട സമിതികള്‍ക്ക് അതിനനുസരിച്ച് തീരുമാനങ്ങള്‍ എടുക്കാവുന്നതാണ്. പരസ്പരസഹകരണത്തിലൂടെയും പ്രാര്‍ത്ഥനയിലൂടെയും ഇത്തരം പ്രയാസങ്ങള്‍ മറികടക്കാനാകുമെന്ന പ്രതീക്ഷയും ഇടവകയ്ക്കുണ്ട്.
പുതിയ ദേവാലയം വിശുദ്ധ കുര്‍ബാനയുടെയും ആരാധനയുടെയും പ്രധാന കേന്ദ്രമായി മാറുമെന്ന പ്രതീക്ഷയിലാണ് ഇടവക സമൂഹം. വിശ്വാസപരിശീലനത്തിനും കുടുംബകൂട്ടായ്മകള്‍ക്കും ഇത് വേദിയാകും. കാനഡയില്‍ വളര്‍ന്നുവരുന്ന പുതിയ തലമുറയ്ക്ക് ക്‌നാനായ കത്തോലിക്കാ വിശ്വാസവും പാരമ്പര്യവും പകര്‍ന്നുനല്‍കാനും ഈ ദേവാലയം സഹായകമാകും.
ഈ പന്ത്രണ്ട് വര്‍ഷത്തെ യാത്രയില്‍ ഒപ്പം നിന്ന എല്ലാവരെയും ഇടവക നന്ദിയോടെ അനുസ്മരിക്കുന്നു. ഇടവകയെ നയിച്ച വൈദികര്‍, മുന്‍കാല കമ്മിറ്റികള്‍, ഇപ്പോഴത്തെ ഭാരവാഹികള്‍ എന്നിവര്‍ അതിലുണ്ട്. പ്രാര്‍ത്ഥനയിലൂടെയും സാമ്പത്തിക സഹായത്തിലൂടെയും പിന്തുണച്ച വിശ്വാസികളും അഭ്യുദയകാംക്ഷികളും അതിലുണ്ട്. ‘ഈ ചരിത്രനേട്ടത്തിന് പിന്നില്‍ പ്രവര്‍ത്തിച്ചവരുടെ നിരയില്‍ ബില്‍ഡിംഗ് കമ്മിറ്റി ചെയര്‍മാന്‍. തോമസ് ആയിരവേലിലിന്റെ നേതൃത്വം നിര്‍ണായകമായിരുന്നു.’
ഒരു പ്രത്യേകത കൂടിയുണ്ട്: ക്‌നാനായ കാത്തലിക് അസോസിയേഷന്‍ ഓഫ് കാനഡയുടെ (KCAC) തറവാട്ടില്‍ ഒരു പള്ളി പിറന്നിരിക്കുന്നു. ‘പള്ളി ഏറ്റെടുത്തതുമായി ബന്ധപ്പെട്ട് ചില കോണുകളില്‍ നിന്നും വിയോജിപ്പുകളും അഭിപ്രായവ്യത്യാസങ്ങളും ഉയര്‍ന്നു വരുന്നുണ്ട്.’
വര്‍ഷങ്ങളായി പലരും സ്വപ്നം കണ്ടതും അനേകര്‍ പ്രാര്‍ത്ഥനയോടെ കാത്തിരുന്നതുമായ ഈ ദേവാലയം ടൊറന്റോ സെന്റ് മേരീസ് ക്‌നാനായ കത്തോലിക്കാ ഇടവകയുടെ ചരിത്രത്തില്‍ എന്നും ഓര്‍മ്മിക്കപ്പെടുന്ന അധ്യായമായി നിലനില്‍ക്കും.
What God had in store has come to fruition today: The Toronto St. Mary’s Knanaya Parish now has its own church.
