വാഷിങ്ടണ്‍: യുഎസില്‍ നിരവധി ഉപയോക്താക്കള്‍ക്ക് യൂട്യൂബ് സേവനം തടസപ്പെട്ടു. വീഡിയോകള്‍ പ്ലേ ചെയ്യാനാകാത്തതും വിവരങ്ങള്‍ അപ്‌ലോഡ് ചെയ്യുന്നതില്‍ പ്രതിസന്ധികള്‍ നേരിടുന്നത് ഉള്‍പ്പെടെയുള്ള പരാതികളാണ് ഉയര്‍ന്നത്. പ്രശ്‌നം ശ്രദ്ധയില്‍പ്പെട്ടിട്ടുണ്ടെന്നും പരിഹരിക്കാനുള്ള നടപടികള്‍ പുരോഗമിക്കുകയാണെന്നും പ്രതികരണവുമായി യൂട്യൂബിന്റെ ഔദ്യോഗിക എക്‌സ് അക്കൗണ്ട് രംഗത്തെത്തി.
സേവനങ്ങളിലെ തടസങ്ങള്‍ നിരീക്ഷിക്കുന്ന ഡൗണ്‍ഡിറ്റക്ടര്‍ പ്ലാറ്റ്ഫോമില്‍ ബുധനാഴ്ച രാവിലെ മുതല്‍ 24,000ത്തിലേറെ പരാതികള്‍ രേഖപ്പെടുത്തിയതായാണ് റിപ്പോര്‍ട്ട്. യൂട്യൂബ് ഉപയോഗിക്കുന്നതിനിടെ നേരിട്ട ബുദ്ധിമുട്ടുകള്‍ നിരവധി ഉപയോക്താക്കള്‍ സമൂഹമാധ്യമങ്ങളിലൂടെയും പങ്കുവച്ചു. എന്നാല്‍ സേവനം തടസപ്പെടാനുള്ള കൃത്യമായ കാരണം സംബന്ധിച്ച് കമ്പനി വിശദീകരണം നല്‍കിയിട്ടില്ല.വീഡിയോകള്‍ ലഭ്യമല്ലെന്ന സന്ദേശം പ്രത്യക്ഷപ്പെടുക, തുടര്‍ച്ചയായ ബഫറിങ്ങില്‍ വീഡിയോകള്‍ കുടുങ്ങുക, സ്‌ക്രീന്‍ കറുത്തനിറത്തില്‍ തുടരുക തുടങ്ങിയ പ്രശ്‌നങ്ങളാണ് ഉപയോക്താക്കള്‍ നേരിട്ടത്. യൂട്യൂബിന്റെ ഡെസ്‌ക്ടോപ്പ് വെബ്‌സൈറ്റിനെയും മൊബൈല്‍ ആപ്പുകളെയും തടസ്സം ബാധിച്ചതായാണ് വിവരം. അതേസമയം, എല്ലാ പ്രദേശങ്ങളിലെയും ഉപയോക്താക്കളെ ഒരുപോലെ പ്രശ്‌നം ബാധിച്ചിട്ടില്ലെന്നും റിപ്പോര്‍ട്ടുകളുണ്ട്.
യൂട്യൂബിന് പുറമെ യൂട്യൂബ് മ്യൂസിക്, ഗൂഗിള്‍ സെര്‍ച്ച് തുടങ്ങിയ സേവനങ്ങള്‍ ഉപയോഗിക്കുന്നതിലും ചിലര്‍ ബുദ്ധിമുട്ടുകള്‍ നേരിട്ടതായി റിപ്പോര്‍ട്ടുകളുണ്ട്. എന്നാല്‍ ഗൂഗിളിന്റെ ഔദ്യോഗിക വര്‍ക്ക്സ്പേസ് സ്റ്റാറ്റസ് ഡാഷ്ബോര്‍ഡില്‍ സേവനങ്ങള്‍ പ്രവര്‍ത്തനക്ഷമമാണെന്നാണ് കാണിച്ചിരുന്നത്. വിവിധ സേവനങ്ങളിലുണ്ടായ പരാതികള്‍ക്ക് പിന്നില്‍ ഒരേ കാരണമാണോയെന്ന കാര്യത്തില്‍ വ്യക്തതയില്ല.
പ്രശ്‌നം പരിഹരിക്കാന്‍ ശ്രമം തുടരുകയാണെന്ന് യൂട്യൂബ് ഔദ്യോഗികമായി അറിയിച്ചിട്ടുണ്ട്. എന്നാല്‍ സേവനം പൂര്‍ണതോതില്‍ സാധാരണ നിലയിലാകുന്ന സമയത്തെക്കുറിച്ചോ തടസ്സത്തിന്റെ സാങ്കേതിക കാരണത്തെക്കുറിച്ചോ കമ്പനി കൂടുതല്‍ വിവരങ്ങള്‍ പുറത്തുവിട്ടിട്ടില്ല. ഉപയോക്താക്കള്‍ നേരിട്ട പ്രശ്‌നങ്ങളുടെ വ്യാപ്തി സംബന്ധിച്ചും ഔദ്യോഗിക സ്ഥിരീകരണം ലഭ്യമായിട്ടില്ല.
YouTube services disrupted in the US; over 24,000 complaints reported.
