ഡാളസ്: ടെക്സസിലെ മക്കിന്നി നാഷണൽ എയർപോർട്ടിൽ (McKinney National Airport) നിന്നുള്ള ആദ്യ വാണിജ്യ യാത്രാ വിമാനം വിജയകരമായി സർവീസ് നടത്തി. പുതിയ പാസഞ്ചർ ടെർമിനലിന്റെ ഉദ്ഘാടനത്തോടനുബന്ധിച്ച് അവെലോ എയർലൈൻസിന്റെ (Avelo Airlines) വിമാനമാണ് ഇവിടെ നിന്നും ആദ്യമായി ആകാശത്തേക്ക് ഉയർന്നത്. നോർത്ത് ടെക്സസിൽ നിന്നുള്ള യാത്രക്കാർക്ക് വലിയ യാത്രാസൗകര്യങ്ങൾ ഒരുക്കുന്ന ഈ പുതിയ നാഴികക്കല്ല് മേഖലയുടെ വികസനത്തിൽ നിർണ്ണായകമാകും.
ഫ്ലോറിഡയിലെ ഫോർട്ട് മെയേഴ്സിലേക്കാണ് ആദ്യ ഔദ്യോഗിക സർവീസ് നടത്തിയത്. ഇതിന് പുറമെ ഡാളസ്-ഫോർട്ട് വർത്ത് മേഖലയിലെ യാത്രക്കാർക്കായി ഡിസംബർ മാസത്തിനുള്ളിൽ വിവിധ നഗരങ്ങളിലേക്ക് നോൺ-സ്റ്റോപ്പ് സർവീസുകൾ ആരംഭിക്കാനും എയർപോർട്ട് അധികൃതർ പദ്ധതിയിടുന്നുണ്ട്. വൻകിട വിമാനത്താവളങ്ങളിലെ തിരക്ക് ഒഴിവാക്കി എളുപ്പത്തിൽ യാത്ര ചെയ്യാൻ ആഗ്രഹിക്കുന്ന സാധാരണക്കാർക്ക് ഈ ചെറിയ എയർപോർട്ട് മികച്ചൊരു ബദലായി മാറും.
46,000 ചതുരശ്ര അടി വിസ്തീർണ്ണമുള്ള അത്യാധുനിക സൗകര്യങ്ങളോട് കൂടിയ പുതിയ ടെർമിനലാണ് യാത്രാക്കാരായി തുറന്നുകൊടുത്തിരിക്കുന്നത്. പുതിയ സർവീസുകൾ ആരംഭിക്കുന്നതിലൂടെ നൂറുകണക്കിന് പുതിയ തൊഴിലവസരങ്ങൾ സൃഷ്ടിക്കപ്പെടുമെന്നും പ്രാദേശിക സമ്പദ്‌വ്യവസ്ഥയ്ക്ക് ഇത് വലിയ കരുത്താകുമെന്നും അധികൃതർ വിലയിരുത്തുന്നു.
