ബർലിൻ: ഗാസയിൽ ഇസ്രായേൽ സൈന്യം നടത്തുന്ന സൈനിക നടപടികളിൽ ആശങ്ക പ്രകടിപ്പിക്കുമ്പോഴും, ഇസ്രായേലിലേക്കുള്ള ആയുധ കയറ്റുമതി ലൈസൻസുകൾ വലിയ തോതിൽ ഉയർത്തി ജർമ്മനി. 2026-ന്റെ ആദ്യ അഞ്ച് മാസത്തിനുള്ളിൽ മാത്രം ഏകദേശം 800 ദശലക്ഷം യൂറോയുടെ (ഏകദേശം 913 ദശലക്ഷം യു.എസ് ഡോളർ) ആയുധ കയറ്റുമതിയ്ക്കാണ് ബെർലിനിലെ ജർമ്മൻ സർക്കാർ അനുമതി നൽകിയത്. കഴിഞ്ഞ 20 മാസങ്ങളിൽ ആകെ നൽകിയ അനുമതികളേക്കാൾ കൂടുതലാണിത്.
തീവ്രവലതുപക്ഷ പാർട്ടിയായ ‘ആൾട്ടർനേറ്റീവ് ഫോർ ജർമ്മനി’ നൽകിയ പാർലമെന്ററി ചോദ്യത്തിന് മറുപടിയായി ജർമ്മൻ വിദേശകാര്യ മന്ത്രാലയമാണ് ഈ വിവരങ്ങൾ ഔദ്യോഗികമായി പുറത്തുവിട്ടത്. ഇതിൽ ഭൂരിഭാഗം അനുമതികളും ഏപ്രിൽ, മേയ് മാസങ്ങളിലാണ് അനുവദിച്ചത്. അനുവദിച്ച ആയുധ ലൈസൻസുകളുടെ ആകെ മൂല്യത്തിന്റെ 60 ശതമാനത്തിലധികവും പേരുവെളിപ്പെടുത്താത്ത ഒരു പ്രധാന “നാവിക പദ്ധതിക്കായാണ്” മാറ്റിവെച്ചിട്ടുള്ളതെന്ന് സർക്കാർ അറിയിച്ചു. ജർമ്മൻ നിർമ്മാതാക്കളായ ടികെഎംഎസ് വികസിപ്പിച്ച അത്യാധുനിക മുങ്ങിക്കപ്പലാകാം ഇതെന്ന് പ്രതിരോധ വിശകലന വിദഗ്ദ്ധർ കരുതുന്നു.
ആണവശേഷിയുള്ള ഡോൾഫിൻ II വിഭാഗത്തിൽപ്പെട്ട ‘ഐ.എൻ.എസ് ഡ്രാക്കൺ’ എന്ന മുങ്ങിക്കപ്പൽ കഴിഞ്ഞ ആഴ്ച ഇസ്രായേൽ നാവികസേനയ്ക്ക് ഔദ്യോഗികമായി കൈമാറിയതായി ജർമ്മൻ മാധ്യമങ്ങൾ റിപ്പോർട്ട് ചെയ്തിരുന്നു. ഏകദേശം 480 ദശലക്ഷം യൂറോ (548 ദശലക്ഷം ഡോളർ) വിലമതിക്കുന്നതാണ് ഈ കപ്പൽ.
ആണവ പോർമുന ഘടിപ്പിച്ച ക്രൂയിസ് മിസൈലുകളോ ബാലിസ്റ്റിക് മിസൈലുകളോ വിക്ഷേപിക്കാൻ ശേഷിയുള്ള വെർട്ടിക്കൽ ലോഞ്ചിംഗ് സിസ്റ്റം ഈ മുങ്ങിക്കപ്പലിൽ അടങ്ങിയിട്ടുണ്ടെന്ന് വിവിധ റിപ്പോർട്ടുകൾ സൂചിപ്പിക്കുന്നു. ഇതോടെ, എയർ ഇൻഡിപെൻഡന്റ് പ്രൊപ്പൽഷൻ സാങ്കേതികവിദ്യയുള്ള പരമ്പരാഗത മുങ്ങിക്കപ്പലുകളിൽ വി.എൽ.എസ് സാങ്കേതികവിദ്യ ഉപയോഗിക്കുന്ന ദക്ഷിണ കൊറിയയ്ക്ക് ശേഷമുള്ള രണ്ടാമത്തെ രാജ്യമായി ഇസ്രായേൽ മാറും. നിർണ്ണായക ഘട്ടങ്ങളിൽ കടലിൽ നിന്ന് തിരിച്ചടിക്കാൻ ഇസ്രായേലിന് ശേഷി നൽകുന്നതാണ് ഇത്തരം മുങ്ങിക്കപ്പലുകൾ.
