വിന്ഡര് (ജോര്ജിയ): 2024-ല് ജോര്ജിയയിലെ അപലാച്ചി ഹൈസ്കൂളില് നടന്ന കൂട്ടവെടിവെപ്പ് കേസില് പ്രതിയായ കോള്ട്ട് ഗ്രേയുടെ പിതാവ് കോളിന് ഗ്രേയ്ക്ക് 15 വര്ഷം തടവുശിക്ഷ വിധിച്ചു. സ്കൂള് വെടിവെപ്പ് കേസില് മകന്റെ കുറ്റകൃത്യത്തിന്റെ പേരില് കൊലക്കുറ്റത്തിന് ശിക്ഷിക്കപ്പെടുന്ന അമേരിക്കയിലെ ആദ്യ മാതാപിതാവാണ് കോളിന് ഗ്രേ. അതുകൊണ്ടുതന്നെ ഈ വിധി രാജ്യത്തെ നിയമചരിത്രത്തില് നിര്ണായകമായി വിലയിരുത്തപ്പെടുകയാണ്.
2024 സെപ്റ്റംബര് 4-ന് അന്ന് 14 വയസ്സുകാരനായ കോള്ട്ട് ഗ്രേ നടത്തിയ വെടിവെപ്പില് രണ്ട് വിദ്യാര്ത്ഥികളും രണ്ട് അധ്യാപകരും കൊല്ലപ്പെടുകയും ഏഴ് പേര്ക്ക് പരിക്കേല്ക്കുകയും ചെയ്തിരുന്നു. അപകടകാരിയായ സ്വഭാവം മകന് ഉണ്ടായിരുന്നുവെന്ന മുന്നറിയിപ്പുകള് ലഭിച്ചിട്ടും, ക്രിസ്മസ് സമ്മാനമായി AR-15 മാതൃകയിലുള്ള റൈഫിള് വാങ്ങിക്കൊടുക്കുകയും അത് സുരക്ഷിതമായി സൂക്ഷിക്കാതിരിക്കുകയും ചെയ്തതാണ് കോളിന് ഗ്രേയ്ക്കെതിരായ കേസിന് അടിസ്ഥാനമായത്.
ശിക്ഷ പ്രഖ്യാപിച്ച ജഡ്ജി നിക്കോളസ് പ്രിം, ആക്രമണം നടത്തുമെന്ന കാര്യം കോളിന് ഗ്രേയ്ക്ക് മുന്കൂട്ടി അറിയില്ലായിരുന്നുവെന്നും, അദ്ദേഹം നേരിട്ട് ആക്രമണത്തില് പങ്കെടുത്തിട്ടില്ലെന്നും ചൂണ്ടിക്കാട്ടി. എന്നാല് മകന്റെ കൈകളിലെത്തിയ ആയുധത്തിന്റെ കാര്യത്തില് കാട്ടിയ ഗുരുതരമായ അശ്രദ്ധയാണ് ഈ ദുരന്തത്തിലേക്ക് നയിച്ചതെന്നും കോടതി നിരീക്ഷിച്ചു. ശിക്ഷ കേള്ക്കുന്നതിനിടെ കോളിന് ഗ്രേ വികാരാധീനനായി കാണപ്പെട്ടതായും പിന്നീട് കൈവിലങ്ങണിയിച്ച് കോടതിയില് നിന്ന് പുറത്തേക്ക് കൊണ്ടുപോയതായും റിപ്പോര്ട്ടുകളുണ്ട്.
വിധി പ്രസ്താവിക്കുന്നതിന് മുമ്പ് കോളിന് ഗ്രേ കോടതിയില് ഒന്നും സംസാരിച്ചില്ല. അതേസമയം, കേസില് വിധിക്കെതിരെ അപ്പീല് നല്കുമെന്ന് അദ്ദേഹത്തിന്റെ അഭിഭാഷകന് അറിയിച്ചു. മനഃപൂര്വമായ കൊലപാതക ഉദ്ദേശ്യമല്ല, മറിച്ച് ‘ക്രിമിനല് അശ്രദ്ധ’യാണ് കേസില് നിര്ണായകമായ ഘടകമെന്ന് കോടതി വ്യക്തമാക്കി.
ഇതിനിടെ, ഇപ്പോള് 16 വയസ്സുള്ള കോള്ട്ട് ഗ്രേ നാല് കൊലപാതകക്കുറ്റങ്ങള് ഉള്പ്പെടെ 55 ഗുരുതര കുറ്റങ്ങള് കോടതിയില് സമ്മതിച്ചിട്ടുണ്ട്. ഇരകളുടെ ബന്ധുക്കളുടെ വികാരനിര്ഭരമായ മൊഴികളും പ്രതിയുടെ കുറ്റസമ്മതവും ഉള്പ്പെട്ട ശിക്ഷാവിധി നടപടികള് വിന്ഡര് സമൂഹത്തെ വീണ്ടും വേദനയിലാഴ്ത്തിയിരിക്കുകയാണ്.
Georgia School Shooting: Accused's Father Sentenced to 15 Years in Prison – A First in American History
